અમેરિકાના વિઝા મળ્યા પછી પણ હવે મુસાફરો માટે ચેતવાની જરૂર છે. અમેરિકા સરકાર, ખાસ કરીને ટ્રમ્પ શાસન હેઠળ, ઇમિગ્રેશન સંબંધિત નિયમો વધુ કડક બનાવી રહી છે. હાલમાં અમેરિકન દૂતાવાસ દ્વારા જાહેર કરાયેલી નવી માર્ગદર્શિકા મુજબ વિઝા મંજૂરી બાદ પણ સતત ‘વિઝા સ્ક્રીનિંગ’ કરવામાં આવશે. કાયદા અથવા નિયમોનું ઉલ્લંઘન કરનાર વિઝાધારકોનा વિઝા રદ કરીને તેમને દેશનિકાલ કરવામાં આવી શકે છે.

‘વિઝા સ્ક્રીનિંગ’ શું છે?

વિઝા સ્ક્રીનિંગનો અર્થ છે કે વિઝા મળ્યા પછી પણ વિઝાધારક અમેરિકન કાયદાઓ અને વિઝા શરતોનું પાલન કરે છે કે નહીં એની સતત તપાસ. માત્ર વિઝા મેળવવો હવે પૂરતું નથી. જો કોઈ વિઝાધારક ખોટી માહિતી આપે છે, કાયદો તોડે છે અથવા સોશિયલ મીડિયા પર અયોગ્ય વસ્તુ શેર કરે છે, તો તેમનો વિઝા રદ થઈ શકે છે.

સોશિયલ મીડિયા ચકાસણી પણ ફરજિયાત

F, M અને J કેટેગરીના વિઝા (સ્ટુડન્ટ અને એક્સચેન્જ વિઝા) માટે અરજી કરતા અરજદારો માટે નવી શરતો મૂકવામાં આવી છે.

• ઉમેદવારોએ છેલ્લા પાંચ વર્ષમાં ઉપયોગમાં લીધેલા તમામ સોશિયલ મીડિયા એકાઉન્ટ્સ જાહેર (Public) રાખવાના રહેશે.
• અમેરિકન ઈમિગ્રેશન અધિકારીઓ આ એકાઉન્ટ્સની ચકાસણી કરશે અને ઉમેદવારની પાત્રતા, વ્યક્તિત્વ અને ઈરાદા વિશે જાણશે.
• ખોટી માહિતી આપનારાઓની અરજી સિદ્ધાંતતઃ નકારાઈ શકે છે, અને ગંભીર અવ્યવહાર માટે આજીવન વિઝા પ્રતિબંધ પણ આવી શકે છે.

“વિઝા હક નથી, વિશેષાધિકાર છે”

દૂતાવાસે સ્પષ્ટ જણાવ્યું છે કે અમેરિકન વિઝા કોઈ નો હક નથી, પણ દેશની રાષ્ટ્રીય સુરક્ષાને ધ્યાને રાખીને અપાતો વિશેષાધિકાર છે. તેથી તમામ અરજદારે યોગ્ય માહિતી આપવી અને તમામ કાયદાઓનું પાલન કરવું આવશ્યક છે.

‘વિઝા ઈન્ટિગ્રિટી ફી’ લાગૂ થશે

ટ્રમ્પ સરકારના નવા નિયમો મુજબ તમામ નોન-ઈમિગ્રન્ટ વિઝા અરજદારો માટે USD 250 (અંદાજે ₹21,000)ની વધારાની “વિઝા ઈન્ટિગ્રિટી ફી” લેવામાં આવશે.

• આ ફી વર્ષ 2026થી અમલમાં આવશે.
• શરતો પૂર્ણ થતા કેટલાક કેસમાં ફી પરત પણ થઈ શકે છે.

ગેરકાયદે પ્રવેશ પર જેલ કે દેશનિકાલ

અમેરિકન દૂતાવાસે ચેતવણી આપી છે કે ગેરકાયદે રીતે પ્રવેશ કરનારાઓને જેલ કે તરત દેશનિકાલનો સામનો કરવો પડી શકે છે. ઉપરાંત, આવાં લોકો માટે ભવિષ્યમાં કોઈપણ પ્રકારના વિઝા માટે અરજી કરવાની તક પણ બંધ થઈ શકે છે.

હવે વિઝા મેળવવો એક વારની પ્રક્રિયા રહી નથી, પણ સતત જવાબદારીભર્યું પાલન જરૂરી છે. વિઝાધારકોએ ખાસ કરીને સોશિયલ મીડિયા પર સાવચેતી રાખવી, સાચી માહિતી આપવી અને અમેરિકન કાયદાનું પાલન કરવું અનિવાર્ય છે.