છત્તીસગઢના પૂર્વ મુખ્યમંત્રી ભૂપેશ બઘેલના પુત્ર ચૈતન્યની EDએ ધરપકડ કરી છે. દારૂ કૌભાંડ કેસમાં EDએ આ કાર્યવાહી કરી છે. આજે સવારે જ્યારે EDની ટીમે દરોડો પાડ્યો ત્યારે ભૂપેશ બઘેલે પણ ભાજપ પર નિશાન સાધ્યું હતું. બઘેલે ભાજપને ‘સાહેબ’ કહીને સંબોધન કર્યું હતું. તમને જણાવી દઈએ કે EDએ મની લોન્ડરિંગ સંબંધિત કેસમાં આ કાર્યવાહી કરી છે. આજે પૂર્વ મુખ્યમંત્રીના પુત્ર ચૈતન્યનો જન્મદિવસ પણ છે.

EDની 3 ટીમો આજે સવારે લગભગ 6:30 વાગ્યે પૂર્વ મુખ્યમંત્રી ભૂપેશ બઘેલના ઘરે પહોંચી હતી. આ દરમિયાન CRPFએ આખા ઘરને ઘેરી લીધું હતું. ED અધિકારીઓનું માનીએ તો, દારૂ કૌભાંડમાં પુરાવા મળ્યા બાદ PMLA હેઠળ આ કાર્યવાહી કરવામાં આવી છે. પૂર્વ મુખ્યમંત્રીએ EDની કાર્યવાહી અંગે આજે X પર પોસ્ટ કરી હતી. જેમાં લખ્યું હતું કે આજે વિધાનસભાના છેલ્લા દિવસે અદાણી માટે તમનારમાં કાપવામાં આવતા વૃક્ષોનો મુદ્દો ઉઠાવવાનો હતો, તે પહેલાં સાહેબે EDને ઘરે મોકલી દીધું છે.

3200 કરોડ રૂપિયાનું છે દારૂ કૌભાંડ

ED ની તપાસ મુજબ તત્કાલીન આબકારી મંત્રી કવાસી લખમા, વિભાગીય સચિવ અનિલ તુટેજા, MD એપી ત્રિપાઠી અને દારૂના વેપારીઓ અરવિંદ સિંહ અને અનવર ઢેબરે એક સિન્ડિકેટ બનાવ્યું હતું. આ સમય દરમિયાન આબકારી નીતિમાં ઘણા ફેરફારો કરવામાં આવ્યા હતા. આ ઉપરાંત નકલી હોલોગ્રામનો ઉપયોગ કરીને સરકારી તિજોરીમાંથી કરોડો રૂપિયાની છેતરપિંડી કરવામાં આવી હતી. તત્કાલીન મંત્રી કવાસી લખમા અને ઘણા IAS અધિકારીઓ હાલમાં આ કેસમાં જેલમાં છે. EOW અનુસાર આ કૌભાંડ લગભગ 3200 કરોડ રૂપિયાનું છે.

તમને જણાવી દઈએ કે ગુરુવારે સરકારે 22 આબકારી અધિકારીઓને સસ્પેન્ડ કર્યા હતા. EOW આ મામલાની તપાસ કરી રહી છે. EOW તપાસ મુજબ, અધિકારીઓએ સિન્ડિકેટ સાથે મળીને લગભગ 88 કરોડ રૂપિયા કમાયા હતા.