દક્ષિણ ઈરાનના ફાર્સ પ્રાંતમાં શનિવારના રોજ એક ભયંકર બસ અકસ્માત થયો છે જેમાં ઘટનાસ્થળે 21 લોકોનાં મૃત્યુ થયાં છે અને 34 લોકોને ઈજાઓ પહોંચી છે. ઈરાની સરકારી મીડિયાના જણાવ્યા અનુસાર, દુર્ઘટના ફાર્સની રાજધાની શીરાજથી દક્ષિણ તરફ બની હતી. ફાર્સ ઇમરજન્સી ઓર્ગેનાઈઝેશનના પ્રમુખ મસૂદ આબેદે જણાવ્યું કે અકસ્માત સવારના લગભગ 11:05 વાગ્યે થયો હતો. ઘટનાની જાણ થતાં જ રેસ્ક્યુ ટીમ ઘટના સ્થળે પહોંચી ગઈ હતી.

અકસ્માત કેવી રીતે બન્યો?

પ્રાથમિક માહિતી મુજબ, શીરાજ જઈ રહેલી એક મુસાફર બસ અચાનક બેકાબુ થઈ ગઈ અને રસ્તાની કિનારી પાસે પલટી ગઈ. બસમાં મોટી સંખ્યામાં મુસાફરો સવાર હતા. એવી શક્યતા છે કે ડ્રાઈવરની બેદરકારી અથવા વાહનમાં કોઈ તંત્રની ખામી હોઈ શકે. અકસ્માત બાદ તરત ઈમરજન્સી ટીમ અને એમ્બ્યુલન્સ ઘટના સ્થળે પહોંચી હતી અને ઘાયલોને નજીકની હોસ્પિટલમાં ખસેડવામાં આવ્યા હતા.

મૃત્યુઆંકમાં વધી શકે છે સંભાવના

અધિકારીઓના જણાવ્યા મુજબ, બચાવ કામગીરી હજી પણ ચાલુ છે અને મૃતકોની સંખ્યા વધે તેવી શક્યતા છે. ઘટના અંગે વિસ્તૃત તપાસ ચાલુ છે, અને ચોક્કસ કારણ તપાસ બાદ સામે આવશે.

ઈરાનમાં દર વર્ષે ભારે મૃત્યુદર

ઈરાનમાં રોડ અકસ્માતો સામાન્ય બનાવ છે. સરકારી આંકડાઓ અનુસાર, દર વર્ષે લગભગ 17,000 લોકો આવી અકસ્માતોમાં મૃત્યુ પામે છે. ટ્રાફિક નિયમોનો ભંગ, જૂના વાહનો અને પૂરતી ઈમરજન્સી સેવાઓ ન હોવી, મોટા કારણો ગણાય છે.