અમદાવાદ એરપોર્ટ પરથી દીવ જવાની તૈયારી કરી રહેલી ઈન્ડિગો એરલાઈન્સની ફ્લાઈટ નંબર ATR76 માં ટેકઓફના સમયે એન્જિનમાં અચાનક આગ લાગી. ફ્લાઈટમાં 60 મુસાફરો હાજર હતા. પાયલટે તરત જ આંતરિક વિમાની ટ્રાફિક નિયંત્રણ કેન્દ્ર (ATC) ને ‘મેડે’ કોલ આપ્યો અને પ્લેનનું ટેકઓફ રોકી દેવામાં આવ્યું.

ટેકઓફ પહેલાં જ રનવે પર ફ્લાઈટ રોલ થઈ ગઈ હતી
રિપોર્ટ અનુસાર, પ્લેનને ટેકઓફ માટે ક્લિયરન્સ મળી ગઈ હતી અને રનવે પર રોલિંગ પણ શરૂ થઈ ગઈ હતી. જોકે એ જ સમયે પ્લેનના એક એન્જિનમાં આગ લાગતાં તાત્કાલીક પગલાં લેવાયા. પાયલટે સમયસૂચકતા દાખવી અને સ્ટાન્ડર્ડ ઓપરેટિંગ પ્રોસિજર મુજબ ફ્લાઈટને રોકી દીધી. તમામ મુસાફરોને સલામત રીતે પ્લેનમાંથી બહાર કાઢવામાં આવ્યા.

ફ્લાઈટ રદ, મુસાફરોને પુરતી સહાય
ઈન્ડિગોના પ્રવક્તાએ સ્પષ્ટતા કરી કે ટેકનિકલ ખામીના કારણે ફ્લાઈટ રદ કરી દેવામાં આવી છે. મુસાફરોને અથવા તો બીજા વિમાને રવાનગી અપાઈ છે અથવા સંપૂર્ણ રિફંડની ઓફર આપવામાં આવી છે. એરલાઈન્સે મુસાફરોને અસુવિધા બદલ ખેદ વ્યક્ત કર્યો છે.

ફ્લાઈટને ઓપરેશનમાંથી હટાવી તપાસ શરૂ
આ ઘટના બાદ સંબંધિત વિમાનને ઓપરેશનમાંથી હટાવવામાં આવ્યું છે અને તેમાં સંપૂર્ણ ટેકનિકલ ચકાસણી હાથ ધરાશે. કંપનીએ ખાતરી આપી છે કે પ્લેન ફરી સેવામાં લેતા પહેલાં તમામ સુરક્ષા પ્રમાણભૂત પ્રક્રિયા ચકાસવામાં આવશે.

આ ઘટનાએ ભારતીય વિમાની સુરક્ષા મુદ્દે ફરી ચર્ચા જગાવી છે. આ અગાઉ પણ 21 જુલાઈએ ગોવા-ઈન્દોર ફ્લાઈટમાં ટેકનિકલ ખામી નોંધાઈ હતી. વિમાની સુરક્ષા વ્યવસ્થાઓ વધુ મજબૂત બનાવવાની જરૂરત વધુ ભારપૂર્વક ઊભી થઈ છે.