વૈશ્વિક સ્તરે કિંમતી ધાતુમાં મંદી : ઘરઆંગણે સોનાચાંદીમાં નરમાઈ

મુંબઈ : અમેરિકન ફેડરલ રિઝર્વ ખાતે ગુરુવારની મુલાકાત દરમિયાન અમેરિકન પ્રમુખ ડોનાલ્ડ ટ્રમ્પે જેરોમ પોવેલને હોદ્દા પરથી દૂર કરવાની જરૂરત  નહીં હોવાના કરેલા નિવેદનને પગલે વૈશ્વિક બજારમાં કિંમતી ધાતુમાં મોટી પીછેહઠ જોવા મળી હતી. અમેરિકા તથા યુરોપિયન યુનિયન વચ્ચે ટેરિફ કરાર નજીકમાં હોવાના અહેવાલોએ પણ હેજ ફન્ડો સોનામાંથી હળવા થઈ સપ્તાહ અંતે ડોલર તરફ વળ્યા હતા જેને પરિણામે ડોલરમાં મજબૂતાઈ રહી હતી. 

વિશ્વ બજારમાં પીછેહઠને પરિણામે ઘરઆંગણે કિંમતી ધાતુમાં બે દિવસમાં ભાવમાં મોટું કરેકશન જોવા મળ્યું છે. મુંબઈમાં સોનામાં બે દિવસમાં રૂપિયા ૨૧૦૦થી વધુ જ્યારે ચાંદીમાં રૂપિયા ૧૫૦૦ જેટલા નીકળી ગયા છે. વેપાર કરારની સ્થિતિમાં વૈશ્વિક અર્થતંત્ર મજબૂત બનવાની ધારણાંએ ક્રુડ તેલના ભાવને ટેકો મળી રહ્યો છે. 

સ્થાનિક મુંબઈ ઝવેરી બજારમાં સતત બીજા દિવસે ભાવમાં પીછેહઠ ચાલુ રહી હતી. ૯૯.૯૦ દસ ગ્રામ સોનાના જીએસટી વગરના ભાવ ઘટી રૂપિયા ૯૮૩૮૮ બોલાતા હતા.

જીએસટી સાથે  ભાવ ત્રણ ટકા ઊંચા મુકાતા હતા. ૯૯.૫૦ દસ ગ્રામ સોનાના જીએસટી વગરના ભાવ રૂપિયા ૯૭૯૯૪ મુકાતા હતા. જીએસટી સાથે ભાવ ત્રણ ટકા ઊંચા મુકાતા હતા. ચાંદી .૯૯૯ એક કિલોના જીએસટી વગરના ભાવ રૂપિયા ૧૧૪૩૪૨ મુકાતા હતા. જીએસટી સાથે ભાવ ત્રણ ટકા ઊંચા મુકાતા હતા.

મુંબઈ સોનામાં બે દિવસમાં રૂપિયા ૨૧૪૫ નીકળી ગયા હતા જ્યારે ચાંદીમાં રૂપિયા ૧૫૦૮નો ઘટાડો થયો છે.અમદાવાદ ઝવેરી બજારમાં સોનુ ૯૯.૯૦ પ્રતિ દસ ગ્રામ રૂપિયા ૧૦૧૫૦૦ તથા ૯૯.૫૦ સોનાના દસ ગ્રામના ભાવ રૂપિયા ૧૦૧૨૦૦ કવોટ થતા હતા.

ચાંદી .૯૯૯ એક કિલોના રૂપિયા ૧,૧૫,૦૦૦  મુકાતા હતા. વિશ્વ બજારમાં સોનુ પ્રતિ ઔંસ ૩૩૪૦ ડોલર જ્યારે ચાંદી ઔંસ દીઠ ૩૮.૭૬ ડોલર મુકાતી હતી. અન્ય કિંમતી ધાતુ પ્લેટિનમ પ્રતિ ઔંસ ૧૩૮૭ ડોલર અને પેલેડિયમ ઔંસ દીઠ ૧૨૧૫ ડોલર મુકાતુ હતું. 

અમેરિકા-યુરોપ વચ્ચે વેપાર કરાર થવાની ગણતરીએ ક્રુડ તેલમાં ભાવ સુધારા તરફી રહ્યા હતા. ડબ્લ્યુટીઆઈ નાયમેકસ ક્રુડ તેલ પ્રતિ બેરલ ૬૬.૫૬ ડોલર જ્યારે આઈસીઈ બ્રેન્ટ ક્રુડ ઓઈલ બેરલ દીઠ ૬૯.૫૨ ડોલર મુકાતુ હતું.