આજના સમયમાં જ્યાં લોકો પૈસાની પાછળ દોડે છે, ત્યાં જાપાનના વેપારી હોશી તાકાયુકીએ કરોડોનો બિઝનેસ છોડીને ભગવાન શિવની ભક્તિનો માર્ગ અપનાવ્યો છે. 41 વર્ષીય હોશી તાકાયુકી, જે પહેલાં ટોક્યોમાં 15 બ્યૂટી પ્રોડક્ટ્સ સ્ટોર્સના માલિક હતા, હવે “બાલા કુંભ ગુરુમુનિ” તરીકે ઓળખાય છે.

હોશી તાકાયુકીની આધ્યાત્મિક યાત્રા 20 વર્ષ પહેલા તમિલનાડુમાં નાડી જ્યોતિષના અનુભવથી શરૂ થઈ હતી. વાંચનમાં જાણવા મળ્યું કે તેમના ભૂતકાળનું જીવન હિમાલયમાં વિતાવ્યું હતું અને તેમને હિન્દુ આધ્યાત્મિકતાનું પાલન કરવાનું છે. થોડા સમય બાદ આવેલા સ્વપ્નમાં તેમણે પોતાને ઉત્તરાખંડના એક ગામમાં જોયા, જેનાથી તેમનું જીવન બદલાઈ ગયું.

આ પ્રેરણાથી તેમણે પોતાનું વ્યાપાર સામ્રાજ્ય અનુયાયીઓને સોંપી શિવભક્તિ અપનાવી. બાલા કુંભ ગુરુમુનિએ ટોક્યોમાં પોતાનું ઘર શિવ મંદિરમાં બદલી નાખ્યું અને બીજું મંદિર પણ બનાવ્યું. હાલમાં તેઓ ઉત્તરાખંડમાં કાવડ યાત્રા દરમિયાન 20 જાપાની અનુયાયીઓ સાથે પવિત્ર ગંગાજળ લઈને ખુલ્લા પગે ચાલતા જોવા મળી રહ્યા છે. યાત્રા દરમિયાન તેમણે દેહરાદૂનમાં કાવડિયાઓ માટે બે દિવસીય ભોજન શિબિરનું આયોજન કર્યું.

તેમણે હવે પુડુચેરીમાં 35 એકર જમીન પર વિશાળ શિવ મંદિર બનાવવાનું આયોજન કર્યું છે તેમજ ઉત્તરાખંડમાં એક આશ્રમ ખોલવાની યોજના પણ બનાવી છે.