રશિયાના કામચાટકા પ્રદેશમાં વહેલી સવારે 8.7ની તીવ્રતાનો શક્તિશાળી ભૂકંપ આવ્યો હતો. યુએસ જિયોલોજિકલ સર્વે (USGS) મુજબ ભૂકંપનું કેન્દ્ર દરિયામાં હતું, જેના કારણે આસપાસના દરિયાકાંઠાઓ પર સુનામીનો ખતરો ઉભો થયો છે. ભૂકંપ બાદ જાપાન અને અમેરિકાની એજન્સીઓએ તાત્કાલિક સુનામીનું એલર્ટ જાહેર કર્યું.

સુનામીની ચેતવણી અમેરિકા અને જાપાન સુધી

સુનામી ચેતવણી માત્ર રશિયાના દરિયાકાંઠાઓ પૂરતી સીમિત નથી, પરંતુ અમેરિકાના કેલિફોર્નિયા અને જાપાન સુધી જાહેર કરવામાં આવી છે. નિષ્ણાતોના જણાવ્યા મુજબ, સમુદ્રમાં લગભગ ત્રણ મીટર ઊંચા મોજા ઉછળી શકે છે, જે કિનારાના વિસ્તારોમાં વિનાશકારી અસર પેદા કરી શકે છે. દરિયાના મોજા કિનારે પહોંચતા કેટલાક વિસ્તારોને ખાલી કરવાની કામગીરી હાથ ધરાઈ છે.

કામચાટકાનો ભૂગોળ અને ભૂકંપનું મહત્વ

આ ભૂકંપને 1952 પછીનો સૌથી શક્તિશાળી ભૂકંપ ગણવામાં આવી રહ્યો છે. કામચાટકા રશિયાના દૂર પૂર્વીય ભાગમાં આવેલો અર્ધદ્વીપ છે. તે સાઈબેરિયાના પૂર્વ કિનારે, બેરિંગ સમુદ્ર, જાપાન અને પ્રશાંત મહાસાગરથી ઘેરાયેલો છે. ભૂગોળીય રીતે તે રશિયાની મુખ્ય ભૂમિ સાથે જોડાયેલો છે અને પ્રશાંત મહાસાગરનો મહત્વપૂર્ણ ભાગ છે.