ગલ્ફ દેશોના ક્રૂડ ઓઈલના ભાવમાં પણ દોઢ ટકાનો ઘટાડો થયો છે. બ્રેન્ટ ક્રૂડના ભાવ 1.48 ટકા ઘટીને $65.85 પ્રતિ બેરલ થયા છે. ઓગસ્ટ મહિનામાં બ્રેન્ટ ક્રૂડમાં 9.21 ટકા એટલે કે $6.68 પ્રતિ બેરલ ઘટાડો નોંધાયો છે. નિષ્ણાતોના મતે, આ ઘટાડો ભારત માટે ખૂબ જ સકારાત્મક છે, કારણ કે ભારત ગલ્ફ દેશોમાંથી મોટા પ્રમાણમાં તેલ આયાત કરે છે.

બેઠકમાં મોટાભાગના મુદ્દાઓ પર કોઈ સહમતિ ન આવી, પરંતુ પુતિને ટ્રમ્પને મોસ્કોમાં આગામી બેઠક માટે આમંત્રણ આપ્યું છે. આથી એવું જણાય છે કે રશિયા અને યુક્રેન વચ્ચે શાંતિની સંભાવના હજી યથાવત છે. તેલના ભાવમાં આવેલા ઘટાડા એનો સંકેત આપે છે કે તણાવ પૂરેપૂરો નથી પરંતુ વાતચીતના દરવાજા ખુલ્લા છે.

આ બેઠક ભારત માટે ખૂબ જ મહત્વપૂર્ણ હતી, કારણ કે જો યુદ્ધવિરામ અંગે કોઈ સકારાત્મક પરિણામ મળ્યું હોત, તો રશિયન તેલ આયાત પર લાદવામાં આવેલા 25 ટકા વધારાના અમેરિકન ટેરિફ દૂર થવાની શક્યતા હતી. હાલ, આ ટેરિફ 28 ઓગસ્ટથી અમલમાં આવશે. જોકે અમેરિકા અને ભારત વચ્ચે ચર્ચા ચાલુ છે અને શક્ય છે કે અમલ પહેલા રાહત મળી શકે.

આ દરમિયાન, એક અહેવાલ મુજબ ઓગસ્ટ મહિનામાં ભારતની રશિયન તેલ આયાતમાં વધારો થયો છે. કેપ્લરના ડેટા મુજબ, ભારત ઓગસ્ટમાં દરરોજ સરેરાશ 2 મિલિયન બેરલ રશિયન ક્રૂડ આયાત કરી રહ્યું છે, જે જુલાઈમાં 1.6 મિલિયન બેરલ હતું. આ વૃદ્ધિ ઇરાક અને સાઉદી અરેબિયાથી આયાતમાં ઘટાડા કારણે થઈ છે.

The post ટ્રમ્પ-પુતિન બેઠક બાદ ક્રૂડ ઓઈલના ભાવમાં ઘટાડો, 100 દેશોને મોટી રાહત appeared first on Gujarat Inside - Latest News Today.