રાહુલ ગાંધીએ કહ્યું કે બિહારમાં કોંગ્રેસ દ્વારા ‘વોટર અધિકાર યાત્રા’ શરૂ કરવામાં આવી છે. તેમણે આરોપ મૂક્યો કે ભાજપ નવી મતદાર યાદીમાં ફાયદો મેળવે છે જ્યારે મતદાર યાદીઓમાં ગડબડ કરવામાં આવે છે. જ્યારે કોંગ્રેસે ચૂંટણી પંચ પાસે CCTV ફૂટેજ અને ઇલેક્ટ્રોનિક મતદાર યાદી માંગ્યા ત્યારે ચૂંટણી પંચે આપવાનો ઇનકાર કર્યો હતો.

તેમણે આક્ષેપ કર્યો કે, વડાપ્રધાન મોદીએ અને ગૃહમંત્રીએ એવો કાયદો બનાવ્યો છે કે મુખ્ય ચૂંટણી કમિશનર સામે કોઈ પણ પ્રકારની કાનૂની કાર્યવાહી શક્ય નથી. “આ કાયદો એટલા માટે બનાવવામાં આવ્યો કે ભવિષ્યમાં કોઈ પણ રીતે વોટ ચોરીને રોકી ન શકાય,” એમ રાહુલ ગાંધીએ દાવો કર્યો.

“અમે વોટ ચોરી થવા દઈશું નહીં. વડાપ્રધાન મોદી અને ચૂંટણી પંચે સમજવું જોઈએ કે હું અને તેજસ્વી તમારાથી ડરતા નથી,” એમ જણાવતાં રાહુલ ગાંધી બિહારમાં યોજાયેલી રેલીમાં લોકો સાથેના જોડાણ અને લોકશક્તિને પણ ઉજાગર કરી હતી. પોલીસના બેરીકેડ હોવા છતાં કોંગ્રેસ કાર્યકરો લોકો સુધી પહોંચ્યા અને ચૂંટણી પ્રક્રિયામાં પારદર્શિતા માટે પોતાની માંગ રજૂ કરી.

The post રાહુલ ગાંધીનો ચૂંટણી પંચ પર આક્ષેપ: ‘હું અને તેજસ્વી તમારાથી ડરતા નથી’ appeared first on Gujarat Inside - Latest News Today.

રાહુલ ગાંધીએ પ્રેઝન્ટેશનની મદદથી દાવો કર્યો કે મહારાષ્ટ્રમાં લગભગ 40 લાખ મતદારો એવા છે જેમની ઓળખ શંકાસ્પદ છે. તેમના જણાવ્યા મુજબ, ચૂંટણી પંચને ઘણા વખતથી ઇલેક્ટ્રોનિક ડેટા માગ્યો હોવા છતાં તેમણે જવાબ આપવાનું ટાળ્યું છે. તેમણે આને ‘મિલીભગત’ ગણાવીને સીધો આક્ષેપ કર્યો કે ભાજપ અને ચૂંટણી પંચ વચ્ચે મતચોરી માટે ગેરકાયદેસર ગઠજોડ છે.

https://youtu.be/KPVF6ihjaz4

આ મુદ્દાને સાબિત કરવા માટે રાહુલ ગાંધીએ કર્ણાટકની બેંગ્લુરૂ સેન્ટ્રલ લોકસભાની મહાદેવપુરા વિધાનસભા બેઠકનું ઉદાહરણ આપ્યું. જ્યાં તેમણે જણાવ્યું કે 6.5 લાખ જેટલાં મતો પૉલ થયા હતા પરંતુ ચકાસણીમાં જાણવા મળ્યું કે એક લાખથી વધુ મતદારો ડુપ્લીકેટ હતાં અને ઘણી એન્ટ્રીઓ ખોટા સરનામાં પર આધારિત હતી. તેમણે દાવો કર્યો કે 11 હજાર લોકો ત્રણ વખત મત આપી ચૂક્યા છે, જ્યારે એક જ રૂમમાં 80થી વધુ મતદારો નોંધાયેલા છે.

રાહુલના દાવા મુજબ, મતચોરીની પ્રક્રિયા પાંચ અલગ-અલગ રીતોથી થઇ રહી છે – જેમાં ડુપ્લીકેટ વોટર્સનો સમાવેશ, ખોટા સરનામા, બલ્ક વોટર્સ, અયોગ્ય ફોટા અને ફોર્મ 6નો દુરૂપયોગ થાય છે.

તેમણે જણાવ્યું કે દેશભરમાં નકલી મતદારોની સંખ્યા વધી રહી છે અને કોંગ્રેસ દ્વારા છ મહિના સુધી ચાલેલી જાતે કરેલી તપાસ પછી આ વિગતો બહાર લાવવામાં આવી છે. રાહુલ ગાંધીએ ભાજપ પર તીખા આક્ષેપ કરતા કહ્યું કે આ તમામ ગેરરીતિઓ ભારતની લોકશાહી માટે ઘાતક સાબિત થઈ શકે છે અને ચૂંટણી પંચે પોતાની જવાબદારી નિભાવવી જોઈએ.

The post મહારાષ્ટ્ર ચૂંટણીમાં મતચોરીના ગંભીર આક્ષેપ: રાહુલ ગાંધીએ ભાજપ અને ચૂંટણી પંચ પર લગાવ્યા આરોપ appeared first on Gujarat Inside - Latest News Today.