રાજસ્થાનમાં ચોમાસુ ફરી સક્રિય થયું છે અને આગામી ચાર દિવસ માટે ભારે વરસાદની આગાહી છે. બંગાળની ખાડીમાં સર્જાયેલી લો-પ્રેશર સિસ્ટમને કારણે ઝાલાવાડ, પ્રતાપગઢ અને બાંસવાડા માટે ઓરેન્જ એલર્ટ જાહેર કરવામાં આવ્યો છે, જ્યારે ચિત્તોડગઢ, બુંદી, કોટા, બારાં, સવાઈ માધોપુર, કરૌલી, ધોલપુર, ભરતપુર, દૌસા અને અલવર માટે યલો એલર્ટ જાહેર છે.

કેટલાક વિસ્તારોમાં સતત વરસાદને કારણે પરિસ્થિતિ ગંભીર બની છે. દૌસા જિલ્લાના લાલસોટમાં નાલાવાસ ડેમ તૂટતાં જયપુરના કોટખાવડા અને ચાકસુ તાલુકાના પાંચથી વધુ ગામોમાં પૂર આવ્યો છે. અનેક લોકોને બચાવવાની કામગીરી ચાલી રહી છે.

ભારે વરસાદના કારણે અનેક દુર્ઘટનાઓ પણ ઘટી છે. પ્રતાપગઢમાં એક શિક્ષક પુલ પરથી માહી નદીમાં પડી ગયા, સવાઈ માધોપુરમાં યુવક બંધ પર સ્ટંટ કરતા તણાઈ ગયો, જોધપુરમાં મકાન ધરાશાયી થયું, પાલીમાં ટ્રક ફસાઈ ગઈ અને જાલોરમાં ત્રણ બાઇક સવાર પાણીમાં તણાઈ ગયા, જેમાંથી એકની શોધ ચાલુ છે.

છેલ્લા 24 કલાકમાં રાજસ્થાનના પૂર્વ અને દક્ષિણ ભાગોમાં નોંધાયેલા વરસાદમાં સૌથી વધુ દૌસા જિલ્લાના નાંગલ રાજાવાતાનમાં 53 મીમી અને રામગઢ પચવારામાં 50 મીમી નોંધાયો છે. ભરતપુર, નાગૌર, જયપુર, કરૌલી, અલવર, બારાં અને સવાઈ માધોપુરના વિસ્તારોમાં પણ ભારે વરસાદ નોંધાયો.

હવામાન વિભાગે આગાહી આપી છે કે 7 સપ્ટેમ્બર સુધી રાજ્યમાં ભારે વરસાદ ચાલુ રહેશે. નદીઓ, નાળાઓ અને ડેમમાં પાણીનું સ્તર વધવાથી પૂર જેવી પરિસ્થિતિ સર્જાઇ શકે છે.

પ્રશાસને જનજાગૃતિ માટે લોકોને સાવચેત રહેવાની અપીલ કરી છે. નદીઓ અને બંધોની નજીક ન જવાની સલાહ આપવામાં આવી છે, અનેક જિલ્લાઓમાં શાળાઓમાં રજા જાહેર કરવામાં આવી છે, અને રાહત-બચાવ ટીમો એલર્ટ પર છે. ગ્રામ્ય વિસ્તારોમાં પાણી ભરાવાથી વીજળી અને વાહનવ્યવહાર પર પણ અસર પડી છે.