સરકાર ટૂંક સમયમાં ભારતના તમામ રિયલ એસ્ટેટ પ્રોજેક્ટ્સ માટે એક ડિજિટલ ડેટાબેઝ શરૂ કરવા જઈ રહી છે. આ પગલું ખાસ કરીને ઘર ખરીદનારા માટે ફાયદાકારક સાબિત થશે, કારણ કે આ પોર્ટલના માધ્યમથી ખરીદદારો છેતરપિંડીથી બચી શકે અને વિશ્વસનીય પ્રોજેક્ટ પસંદ કરી શકે. ડેટાબેઝમાં પ્રોજેક્ટની તમામ જરૂરી જાણકારી જેમ કે મંજૂરી, કન્સ્ટ્રક્શનની પ્રગતિ, બિલ્ડરોની વિશ્વસનીયતા અને અન્ય વિગતો સમાવિષ્ટ હશે.

આ પોર્ટલ દ્વારા લોકો દેશભરના કોઈપણ બિલ્ડર અને તેના પ્રોજેક્ટ વિશે સંપૂર્ણ માહિતી સરળતાથી મેળવી શકશે. ખાસ કરીને તે લોકો માટે આ મોટી રાહત છે, જેઓ RERA કાયદા હોવા છતાં પ્રોજેક્ટ વિલંબ અને છેતરપિંડીનો ભોગ બન્યા હતા.

આ નિર્ણય ઘરોના ખરીદદારોની ફરિયાદોને ધ્યાનમાં રાખીને લેવામાં આવ્યો છે. વડા પ્રધાન નરેન્દ્ર મોદીએ તાજેતરમાં RERA અને રાજ્ય અધિકારીઓને ઘર ખરીદદારોની ફરિયાદોને યોગ્ય રીતે નિરાકરણ આપવાની સૂચના આપી હતી. ત્યારબાદ આવાસ અને શહેરી બાબતોના મંત્રી મનોહર લાલ ખટ્ટરે RERA સેન્ટ્રલ એડવાઇઝરી કાઉન્સિલની બેઠકમાં આ નવું ડિજિટલ પોર્ટલ લોન્ચ કર્યું.

બેઠકમાં મહારાષ્ટ્રની હાઉસિંગ પોલિસી 2025ના મુદ્દા પર પણ ચર્ચા થઈ, જેમાં રજૂઆત કરવામાં આવી કે અલગ કાયદાઓ રિયલ એસ્ટેટમાં ‘ફોરમ શોપિંગ’ને પ્રોત્સાહન આપી શકે છે અને RERAના એકસરખા માળખાને નબળું કરી શકે છે. FPCE દ્વારા કેન્દ્રને હસ્તક્ષેપ માટે અપીલ કરવામાં આવી હતી, કારણ કે ભવિષ્યમાં અલગ કાયદાઓ સમગ્ર ક્ષેત્રમાં ગેરવ્યવસ્થા ફેલાવી શકે છે.

આ સાથે આવાસ મંત્રાલયે રિપોર્ટમાં જણાવ્યું કે RERAના આઠ વર્ષ પૂરાં થયા બાદ હવે ‘નેક્સ્ટ-જેન’ સુધારાઓ પર ધ્યાન કેન્દ્રિત કરવું જરૂરી છે. તેમાં કડક અમલ, ભ્રામક જાહેરાતો પર પ્રતિબંધ, નોંધણી પ્રક્રિયાને ઝડપી બનાવવી, આદેશોનું પાલન સુનિશ્ચિત કરવું અને વ્યાખ્યાઓમાં સ્પષ્ટતા લાવવી જેવા પગલાંનો સમાવેશ થાય છે. મંત્રાલયનું લક્ષ્ય RERAને વધુ અસરકારક અને પારદર્શક બનાવવું છે.