બિહારમાં વિધાનસભાની ચૂંટણી પહેલાં મોદી સરકારે રાજ્યને વિશાળ ઇન્ફ્રાસ્ટ્રક્ચર પેકેજ આપ્યું છે. કેન્દ્રીય મંત્રીમંડળે 7,616 કરોડ રૂપિયાના બે મહત્ત્વપૂર્ણ પ્રોજેક્ટ્સને મંજૂરી આપી છે, જે બિહાર તેમજ પાડોશી રાજ્યોમાં કનેક્ટિવિટી સુધારશે અને આર્થિક પ્રવૃત્તિઓને ગતિ આપશે.

કેન્દ્રીય મંત્રી અશ્વિની વૈષ્ણવે માહિતી આપતા જણાવ્યું કે, 4,447 કરોડના ખર્ચથી બક્સર-ભાગલપુર હાઈ-સ્પીડ કોરિડોરના મોકામા-મુંગેર ખંડના 82 કિમી લાંબા ફોર-લેન હાઈવેને મંજૂરી આપવામાં આવી છે. આ પ્રોજેક્ટ પૂર્ણ થતા મુસાફરીમાં લગભગ એક કલાકનો સમય બચશે.

આ સાથે જ 3,169 કરોડના ખર્ચે ભાગલપુર-દુમકા-રામપુરહાટ ડબલ ટ્રેક રેલ લાઈન (177 કિમી) ના નિર્માણને પણ મંજૂરી મળી છે, જે બિહાર, ઝારખંડ અને પશ્ચિમ બંગાળને સીધી કનેક્ટિવિટી આપશે.

અશ્વિની વૈષ્ણવે જણાવ્યું કે આ પ્રોજેક્ટ્સ વડાપ્રધાનના ત્રીજા કાર્યકાળમાં મંજૂર કરાયેલા કુલ 11 લાખ કરોડના ઇન્ફ્રાસ્ટ્રક્ચર રોકાણનો એક ભાગ છે, જે રોજગાર તકો વધારશે અને લોકોના જીવનમાં પરિવર્તન લાવશે.

ચૂંટણી પૂર્વે આવી જાહેરાતો પર ઉઠેલા સવાલોના જવાબમાં મંત્રીએ જણાવ્યું કે પ્રોજેક્ટ્સને માત્ર ચૂંટણી રાજ્યો માટે જ નહીં પરંતુ દેશના વિવિધ ભાગોમાં પણ મંજૂરી આપવામાં આવી રહી છે.