આગામી 19 સપ્ટેમ્બરે યોજાનારી ભરૂચ ડેરી ચૂંટણી પહેલા ભાજપમાં રાજકારણ ગરમાવી ગયું છે. પાર્ટીએ ચૂંટણી પહેલા 6 સભ્યોને સસ્પેન્ડ કરવાની કાર્યવાહી કરી છે.

પ્રદેશ ભાજપ અધ્યક્ષ સી. આર. પાટીલના મેન્ડેટ વિરુદ્ધ ઉમેદવારી કરનારા સભ્યો પર આ કાર્યવાહી કરવામાં આવી છે. આ સભ્યોને ભરૂચ જિલ્લા ભાજપ પ્રમુખ પ્રકાશ મોદીએ સસ્પેન્ડ કર્યો છે.

પ્રાપ્ત માહિતી અનુસાર, આગામી ચૂંટણીમાં ભાજપ તરફથી ધારાસભ્ય અરૂણસિંહ રાણાની પેનલના ત્રણ સભ્યો અને ઘનશ્યામ પટેલની પેનલના 12 સભ્યોને મેન્ડેટ આપવામાં આવ્યા હતા.

પરંતુ મેન્ડેટ વિરુદ્ધ ઉમેદવારી કરનારા 6 સભ્યોને પાર્ટીએ સસ્પેન્ડ કરી દેવામાં આવ્યા છે, તેમજ મેન્ડેટવાળા બે સભ્યોને પણ સસ્પેન્ડ કરવામાં આવ્યા છે.

ધારાસભ્ય અરૂણસિંહ રાણાની પેનલના સભ્યો શાંતાબેન પટેલ અને નટવરસિંહ પરમારને સસ્પેન્ડ કરવામાં આવ્યા છે, જ્યારે મેન્ડેટ વિરુદ્ધ ઉમેદવારી કરનારા હેમંતસિંહ રાજ, જગદીશ પટેલ, જિગ્નેશ પટેલ અને વિનોદ પટેલને પણ પક્ષમાંથી સસ્પેન્ડ કરાયા છે.

19 સપ્ટેમ્બર પહેલાં ભાજપ દ્વારા લેવામાં આવેલા આ પગલાંના કારણે ભરૂચના રાજકારણમાં ગરમાવો ફેલાયો છે અને સ્થાનિક રાજકીય પરિસ્થિતિ વધુ તેજ થઈ ગઈ છે.