અમૂલ બ્રાન્ડ હેઠળ ડેરી ઉત્પાદનો વેચનારી ગુજરાત કોઓપરેટિવ મિલ્ક માર્કેટિંગ ફેડરેશન (GCMMF) એ શનિવારે ઘી, માખણ, આઈસ્ક્રીમ, ચીઝ, બેકરી અને ફ્રોઝન નાસ્તા સહિત 700થી વધુ ઉત્પાદનોના ભાવમાં ઘટાડાની જાહેરાત કરી છે.

આ નિર્ણય GSTના નવા ઘટાડેલા દરનો સીધો લાભ ગ્રાહકો સુધી પહોંચાડવા માટે લેવામાં આવ્યો છે. નવી કિંમતો 22 સપ્ટેમ્બર, 2025થી અમલમાં આવશે.

GCMMFએ જણાવ્યું કે, આ સુધારા ખાસ કરીને માખણ, ઘી, UHT દૂધ, આઈસ્ક્રીમ, ચીઝ, ચોકલેટ, બેકરી રેન્જ, ફ્રોઝન પનીર અને બટાકાના નાસ્તા, કન્ડેન્સ્ડ મિલ્ક, પીનટ સ્પ્રેડ, માલ્ટ આધારિત પીણાં વગેરે કેટેગરીમાં લાગુ પડ્યા છે.

માખણ (100 ગ્રામ)ની MRP 62 રૂપિયાથી ઘટાડી 58 રૂપિયા કરવામાં આવી છે, જ્યારે ઘીના ભાવ 40 રૂપિયા ઘટાડી 610 રૂપિયા પ્રતિ લિટર કરવામાં આવ્યા છે.

અમૂલ પ્રોસેસ્ડ ચીઝ બ્લોક (1 કિલો) 30 રૂપિયા ઓછામાં 545 રૂપિયા પ્રતિ કિલો, અને ફ્રોઝન પનીર (200 ગ્રામ) 99 રૂપિયાથી ઘટાડી 95 રૂપિયા કરવામાં આવ્યો છે.

GCMMFએ જણાવ્યું કે ભાવ ઘટાડાથી ડેરી ઉત્પાદનો, ખાસ કરીને આઈસ્ક્રીમ, ચીઝ અને માખણનો વપરાશ વધશે. 36 લાખ ખેડૂત સભ્યોએ માલિકીની આ ફેડરેશનનું માનવું છે કે વપરાશમાં વધારો અમૂલના વ્યવસાયને પણ પ્રોત્સાહન આપશે.

નોંધનીય છે કે મધર ડેરીએ પણ 22 સપ્ટેમ્બરથી પોતાના ઉત્પાદનોના ભાવમાં ઘટાડાની જાહેરાત કરી હતી.