IND vs SA: 45 રન બનાવીને પણ સ્મૃતિ મંધાનાએ રચ્યો ઈતિહાસ, મિતાલી રાજનો રેકોર્ડ તોડ્યો

Women’s World Cup: ICC મહિલા ક્રિકેટ વર્લ્ડ કપ 2025 ના ફાઇનલમાં રવિવારે (2 નવેમ્બર) ભારતીય ટીમનો મુકાબલો દક્ષિણ આફ્રિકા સામે થયો હતો. નવી મુંબઈની DY પાટિલ સ્પોર્ટ્સ એકેડેમીમાં રમાયેલી મેચમાં ઓપનર સ્મૃતિ મંધાનાએ ભારતીય ટીમ માટે સારી બેટિંગ કરી હતી. જેમાં સ્મૃતિએ 58 બોલમાં 45 રન બનાવ્યા હતા, જેમાં 8 ચોગ્ગા ફટકાર્યા હતા. 

સ્મૃતિએ 58 બોલમાં 45 રન બનાવ્યા

સ્મૃતિ મંધાનાને વિકેટકીપર સિનાલો જાફ્તાએ કેચ આઉટ કર્યા. સ્મૃતિએ શેફાલી વર્મા સાથે મળીને 104 રનની ઓપનિંગ ભાગીદારી કરી હતી. 45 રનની ઇનિંગ દરમિયાન તેમણે એક મોટો રેકોર્ડ બનાવ્યો છે. સ્મૃતિ મહિલા ODI વર્લ્ડ કપના એક જ એડિશનમાં ભારત માટે સૌથી વધુ રન બનાવનાર ખેલાડી બની ચૂકી છે.

મિતાલી રાજનો રેકોર્ડ તોડ્યો

સ્મૃતિ મંધાનાએ પૂર્વ ભારતીય કેપ્ટન મિતાલી રાજનો રેકોર્ડ તોડ્યો છે. મિતાલી રાજે 2017 ODI વર્લ્ડ કપમાં નવ ઇનિંગ્સમાં 409 રન બનાવ્યા હતા. ફાઇનલ પહેલા સ્મૃતિ મંધાનાના નામે 389 રન હતા. એટલે કે, મંધાનાએ મિતાલીનો રેકોર્ડ તોડવા માટે ફક્ત 21 રનની જરૂર હતી.

સ્મૃતિ મંધાનાએ ફાઇનલ મેચની પહેલી ઇનિંગમાં પ્રસિદ્ધિ હાસલ કરી છે. સ્મૃતિએ આ વર્લ્ડ કપમાં કુલ નવ ઇનિંગ રમી હતી, જેમાં 54.25ની સરેરાશથી 434 રન બનાવ્યા હતા. જેમાં સ્મૃતિએ એક સદી અને બે અડધી સદી ફટકારી હતી. વર્તમાન વર્લ્ડ કપમાં સ્મૃતિ કરતાં વધુ રન ફક્ત દક્ષિણ આફ્રિકાની કેપ્ટન લૌરા વોલવાર્ટે બનાવ્યા છે.

મહિલા વર્લ્ડ કપના એક જ એડિશનમાં સૌથી વધુ રન

સ્મૃતિ મંધાના – 434 રન (9 ઇનિંગ્સ, 2025)

મિતાલી રાજ – 409 રન (9 ઇનિંગ્સ, 2017)

પૂનમ રાઉત – 381 રન (9 ઇનિંગ્સ, 2017)

હરમનપ્રીત કૌર – 359 રન (8 ઇનિંગ્સ, 2017)

સ્મૃતિ મંધાના – 327 રન (7 ઇનિંગ્સ, 2022)

આ પણ વાંચો: મહિલા વર્લ્ડકપ ફાઈનલ LIVE: 200ને પાર થયો ભારતનો સ્કોર, દીપ્તિ અને હરમનની જોડી ક્રીઝ પર

દક્ષિણ આફ્રિકાના કેપ્ટન લૌરા વોલવાર્ટે ટોસ જીતીને પહેલા બોલિંગ કરવાનો નિર્ણય લીધો હતો. વરસાદ અને ઝાકળને કારણે તેમણે આ નિર્ણય લીધો હતો. ભારતની કેપ્ટન હરમનપ્રીત કૌર પણ પહેલા બોલિંગ કરવા માંગતી હતી, પરંતુ તેમની ટીમને બેટિંગ કરવાની ફરજ પડી હતી.