નવી દિલ્હી: ભાજપના IT સેલના વડા અમિત માલવિયાએ કોંગ્રેસ પર ફરીથી ગંભીર આરોપો લગાવતા જણાવ્યું છે કે કોંગ્રેસના પ્રવક્તા પવન ખેડા પાસે બે અલગ વિધાનસભા વિસ્તારોમાં સક્રિય વોટર-ID કાર્ડ છે. તેમણે રાહુલ ગાંધીના ‘વોટ ચોરી’ અભિયાન પર પણ સવાલ ઉઠાવતા દાવો કર્યો કે સોનિયા ગાંધીએ ભારતીય નાગરિકતા મેળવતા પહેલા જ મતદાર યાદીમાં નામ નોંધાવી લીધું હતું.

અમિત માલવિયાએ મંગળવારે X પર લખ્યું, “રાહુલ ગાંધી ‘વોટ ચોરી’નો આરોપ લગાવે છે, પરંતુ તેમની માતા સોનિયા ગાંધીએ ભારતીય નાગરિક બનતા પહેલા જ મતદાર યાદીમાં નામ નોંધાવી દીધું હતું.” તેઓએ જણાવ્યું કે, પવન ખેડા પાસે બે અલગ વિધાનસભા ક્ષેત્રોમાં બે સક્રિય એપિક નંબર છે.

આ અંગેના વિગતવાર ડેટા પ્રમાણે, પવન ખેડાના પહેલાના વોટર-ID કાર્ડમાં જંગપુરા વિધાનસભા વિસ્તાર અને નિઝામુદ્દીન ઈસ્ટ પાર્ટનો સમાવેશ થાય છે, જ્યારે બીજા કાર્ડમાં નવી દિલ્હી વિધાનસભા વિસ્તાર અને કાકા નગર પાર્ટનો સમાવેશ છે.

માલવિયાએ ચૂંટણી પંચને પવન ખેડા પાસે બે વોટર-ID હોવાની તપાસ કરવા અને એકથી વધુ વખત મતદાન કરવાના આરોપોની તપાસ કરવાની અપીલ કરી છે. તેમણે દાવો કર્યો કે કોંગ્રેસે ગેરકાયદેસર ઘૂસણખોરોને મતદાર તરીકે માન્યતા આપી ભારતીય લોકશાહીને નુકસાન પહોંચાડ્યું છે.

અંતે, અમિત માલવિયાએ કહ્યું કે “કોંગ્રેસ જ અસલી ‘વોટ ચોર’ છે અને તેઓ હવે ચૂંટણી પંચની તપાસથી ડરી રહ્યા છે. દેશને સમજવું જોઈએ કે રાહુલ ગાંધી લોકશાહી માટે ખતરનાક છે.”