પંચમહાલ જિલ્લાના ઘોઘંબા તાલુકામાં છેલ્લા ચાર દિવસથી ભારે વરસાદ વરસતા કરાડ ડેમ છલકાઈ ગયો છે અને આથી જળબંબાકારની સ્થિતિ સર્જાઈ છે. કરાડ ડેમ હવે 142 ફૂટની ભયજનક સપાટીને પહોંચી ગયો છે, જેના પગલે સ્થાનિક વહીવટી તંત્ર સજ્જ થયું છે.

તંત્ર દ્વારા ડેમના નીચે આવેલા 24 થી વધુ ગામોના નાગરિકોને સાવચેત રહેવાની સૂચના આપવામાં આવી છે. લોકોને સલામત સ્થળે ખસીને કોઈપણ કટોકટીનો સામનો કરવા માટે તૈયાર રહેવા જણાવાયું છે.

મેઘમહેર અને ડેમમાં પાણીની આવક વધતા અનેક માર્ગો પર વાહનવ્યવહાર ખોરવાઈ ગયો છે. બોરીયા-મઠ જેકનપુરા રોડ પર પાણી ભરાવાના કારણે વાહનચાલકો માટે માર્ગ બંધ કરાયો છે અને હવે લોકો રાજગઢ તરફથી લાંબો વિકલ્પિક રસ્તો વાપરવા મજબૂર થયા છે. ધનેશ્વર અને નવાકુવા વિસ્તારના ક્રોસવે પર પણ પાણી ભરાઇને વાહનવ્યવહાર થંભી ગયો છે.

સ્થાનિક વહીવટી તંત્ર દ્વારા બોરીયા અને મઠ જેકનપુરા પુલ પર બે ફૂટથી વધુ પાણી ફરી વળ્યા હોવાથી લોકોને આ માર્ગનો ઉપયોગ ન કરવા અનુરોધ કરવામાં આવ્યો છે. તંત્ર પરિસ્થિતિ પર સતત નજર રાખી રહ્યું છે અને જરૂર પડે તો તાત્કાલિક રાહત અને બચાવ કામગીરી હાથ ધરવા માટે તૈયાર છે.