અમેરિકાના પૂર્વ પ્રમુખ ડોનાલ્ડ ટ્રમ્પે ફરી એકવાર વૈશ્વિક રાજકીય અને આર્થિક વર્તુળોમાં ખળભળાટ મચાવ્યો છે. અહેવાલો મુજબ, ટ્રમ્પે યુરોપિયન યુનિયન (EU)ના અધિકારીઓ સાથેની એક કોન્ફરન્સ કોલ દરમિયાન ભારત અને ચીન સામે 100 ટકા ટેરિફ લાગુ કરવાની અપીલ કરી છે.

ટ્રમ્પનું માનવું છે કે ભારત અને ચીન રશિયાથી તેલ ખરીદનારા સૌથી મોટા ગ્રાહકો છે અને તેમના વેપારથી જ રશિયાનું અર્થતંત્ર મજબૂત બની રહ્યું છે. આ કારણે જ 2022થી યુક્રેન સામેના યુદ્ધમાં રશિયાને સતત ફાયદો મળતો રહ્યો છે.

ટ્રમ્પના મત મુજબ જો ઈયુ ભારત અને ચીન સામે 100 ટકા ટેરિફ લગાવે તો રશિયા પર આર્થિક દબાણ વધી શકે છે, જેનાથી રશિયા-યુક્રેન યુદ્ધ સમાપ્ત કરવામાં મદદ મળી શકે છે. તેમણે વધુમાં ઉમેર્યું કે જો ઈયુ આવા કડક પગલાં લેશે તો અમેરિકા પણ સમાન રીતે ભારત અને ચીન સામે 100 ટકા ટેરિફ લાગુ કરશે.

હાલમાં ઈયુનું પ્રતિનિધિમંડળ વોશિંગ્ટનમાં છે અને ટ્રમ્પ સાથેની ચર્ચા દરમિયાન વેપાર પ્રતિબંધો અને વ્યૂહાત્મક નીતિઓ અંગે ચર્ચા કરવામાં આવી હોવાની માહિતી સામે આવી છે.

યુરોપિયન નેતાઓ માટે આ પ્રસ્તાવ રાજકીય રીતે સંવેદનશીલ માનવામાં આવી રહ્યો છે, કારણ કે ભારત અને ચીન સાથેના વેપાર સંબંધો યુરોપ માટે અત્યંત મહત્વપૂર્ણ છે.

ટ્રમ્પની આ ટિપ્પણીથી એક તરફ વૈશ્વિક રાજકીય અર્થતંત્રમાં તણાવની શક્યતા વધતી દેખાઈ રહી છે તો બીજી તરફ આ અપીલ અમલમાં આવે તો તે ભારત, ચીન તેમજ યુરોપિયન બજાર માટે મોટા પડકારો ઉભા કરી શકે છે.