અમદાવાદ: નવરાત્રિની ઉજવણી પહેલા જ અમદાવાદમાં ભારે વરસાદની શરૂઆત થઈ ગઈ છે. વહેલી સવારથી શહેરના વસ્ત્રાપુર, નવા વાડજ, રાણીપ, ગોતા, એસજી હાઇવે, બોડકદેવ, સિંધુભવન રોડ, કાલુપુર, રાયપુર, જમાલપુર, ખાડિયા, રાયખડ, નિકોલ, નારોલ, નરોડા, ઠક્કરનગર, મેમનગર, બાપુનગર અને વિજય ચાર રસ્તા વિસ્તારમાં ધોધમાર વરસાદ પડ્યો છે.

GMDC ગ્રાઉન્ડમાં વરસાદના પાણી ભરાતા ગરબા આયોજકોમાં ચિંતાનો માહોલ સર્જાયો છે. મુખ્ય પ્રવેશદ્વાર પાસે પાણી ભરાયું છે અને ગ્રાઉન્ડમાં ઠેર-ઠેર કાદવ કીચડ દેખાઈ રહી છે.

પાણી ભરાતા ખેલૈયાઓના રંગમાં ભંગ પડવાની આશંકા વ્યક્ત કરવામાં આવી છે. સામાન્ય વરસાદના કારણે શહેરના રસ્તાઓ પર વાહનચાલકોને પણ મુશ્કેલીનો સામનો કરવો પડ્યો છે.

હવામાન વિભાગની માહિતી મુજબ છેલ્લા 24 કલાકમાં રાજ્યના 81 તાલુકામાં વરસાદ નોંધાયો છે.

સૌથી વધુ વરસાદ નોંધાયો છે:

• વાગરામાં 3.78 ઇંચ
• સુરતમાં 3.31 ઇંચ
• લાઠીમાં 2.13 ઇંચ
• ગઢડામાં 1.97 ઇંચ
• વંથલીમાં 1.81 ઇંચ
• બાબરામાં 1.77 ઇંચ
• લિલિયામાં 1.54 ઇંચ
• તળાજામાં 1.42 ઇંચ
• વાઘોડિયામાં 1.18 ઇંચ
• કામરેજમાં 1.18 ઇંચ
• ઝઘડિયામાં 1.14 ઇંચ
• ગરબાડામાં 1.02 ઇંચ 
• વડોદરામાં 0.98 ઇંચ

આગાહી અનુસાર, રાજ્યમાં આજે હળવો થી મધ્યમ વરસાદ પડે તેવી શક્યતા છે.

ઉત્તર ગુજરાત અને કચ્છમાં ચોમાસાની વિદાય વચ્ચે પણ હવામાન વિભાગે વરસાદની આગાહી વ્યક્ત કરી છે, જેના કારણે નવરાત્રિ દરમ્યાન આયોજકો અને શહેરવાસીઓએ સાવચેતી રાખવી જરૂરી છે.