બિહાર વિધાનસભા ચૂંટણી 2025ને લઈને રાજકીય ગરમાવો વધ્યો છે અને આરજેડી પ્રમુખ લાલુ પ્રસાદ યાદવના મોટા પુત્ર તેજપ્રતાપ યાદવ ફરી એકવાર ચર્ચામાં આવ્યા છે.

આરજેડી છોડ્યા બાદ તેજપ્રતાપ યાદવે મહુઆ મતવિસ્તારથી પોતાની ઉમેદવારી જાહેર કરીને પોતાના નવા રાજકીય માર્ગનો સંકેત આપ્યો છે. ઇન્ટરવ્યુ દરમિયાન તેજપ્રતાપ યાદવે સ્પષ્ટ રીતે જણાવ્યું કે, “હું ગીતા અને ભગવાન કૃષ્ણના શપથ લઉં છું કે હું ક્યારેય આરજેડીમાં પાછો નહીં ફરું.”

તેમણે વધુમાં ઉમેર્યું કે ગમે તેટલા આમંત્રણો મળે, તેઓ આરજેડીમાં પરત નહીં જાય અને પોતાનો રાજકીય માર્ગ અલગ રીતે બનાવશે.

પોતાના પરિવાર પ્રત્યેનો પ્રેમ અને આદર વ્યક્ત કરતાં તેજપ્રતાપે કહ્યું કે, “અમારા માતા-પિતા અમારા દેવતા જેવા છે અને અમે તેમનો આદર કરીએ છીએ, પરંતુ રાજકારણ અને પરિવાર અલગ બાબતો છે.”

મહુઆમાંથી ઉમેદવારી જાહેર કરીને તેજપ્રતાપે સ્પષ્ટ કર્યું કે તેઓ પોતાની રાજકીય કારકિર્દી સ્વતંત્ર રીતે આગળ ધપાવશે. તેમણે બહેનોને પણ ખુલ્લું આમંત્રણ આપ્યું કે જો તેઓ ઇચ્છે તો તેમની પાર્ટીમાં જોડાઈ શકે છે અને તેમને ટિકિટ પણ મળશે.

રાજકીય વિશ્લેષકો માને છે કે તેજપ્રતાપનો આ નિર્ણય બિહારના રાજકીય પરિદૃશ્યને વધુ રસપ્રદ બનાવશે, કારણ કે તેઓ હવે આરજેડી વિના પોતાની અલગ રાજકીય ઓળખ સ્થાપિત કરવાનો પ્રયાસ કરી રહ્યા છે.