શ્રીલંકાના ઉવા પ્રાંતના બડુલ્લા જિલ્લામાં એક ભયાનક બસ દુર્ઘટનામાં 9 મહિલાઓ સહિત 15 લોકોના મોત થયા છે, જ્યારે 15 વધુ લોકો ગંભીર ઈજાગ્રસ્ત થયા છે. ગુરુવારે મોડી રાત્રે ખાનગી બસ લગભગ 1000 ફૂટ ઊંડી ખીણમાં ખાબકી હોવાની જાણ મળી હતી. તરત જ સ્થાનિક તંત્ર અને રાહતકર્મીઓએ બચાવ કામગીરી શરૂ કરી.

શ્રીલંકન પોલીસના જણાવ્યા પ્રમાણે, બસમાં સવાર તમામ મુસાફરો દક્ષિણ શ્રીલંકાના તાંગલ્લે શહેરમાંથી પ્રવાસ પર નીકળ્યા હતા. મીડિયાની રિપોર્ટ્સ અનુસાર, એલ્લા કસ્બા નજીક બસ પહેલાં એક જીપ સાથે અથડાઈ હતી, જેના કારણે ડ્રાઈવરે બસ પર કાબુ ગુમાવ્યો અને બસ રસ્તાની રેલિંગ તોડી ઊંડી ખીણમાં ખાબકી ગઈ.

દુર્ઘટનામાં તમામ ઘાયલોને તાત્કાલિક બડુલ્લા ટીચિંગ હોસ્પિટલમાં દાખલ કરવામાં આવ્યા છે, જેમાં ઘણી વ્યક્તિઓની હાલત ગંભીર હોવાનું જાણવા મળ્યું છે. મૃતકોમાં 9 મહિલાઓનો સમાવેશ થાય છે અને એવો અંદાજ છે કે તેઓ તાંગલ્લે અર્બન કાઉન્સિલના કર્મચારીઓ હતા અને શૈક્ષણિક પ્રવાસ પર ગયા હતા. સેના, પોલીસ અને સ્થાનિક રહેવાસીઓએ મળીને રાત્રિના કાળમાં બચાવ કામગીરીને સફળતાપૂર્વક અંજામ આપ્યો.