આંધ્ર પ્રદેશ: આંધ્ર પ્રદેશના ગુંટુર જિલ્લાના તુરાકાપાલેમ ગામમાં છેલ્લા બે મહિનાથી રહસ્યમય બીમારી ફેલાઈ રહી છે, જેના કારણે અત્યાર સુધીમાં ઓછામાં ઓછા 20 લોકોનાં મોત થયા છે. આ પરિસ્થિતિને ધ્યાનમાં રાખીને મુખ્યમંત્રી એન. ચંદ્રબાબુ નાયડુએ શુક્રવારે સ્વાસ્થ્ય ઈમરજન્સી જાહેર કરી છે અને ગામમાં ઉચ્ચ સ્તરીય તબીબી ટીમોને તપાસ માટે મોકલી છે.

સ્વાસ્થ્ય શિક્ષણ નિયામક ડૉ. રઘુનંદનના નેતૃત્વ હેઠળની ટીમે તુરાકાપાલેમ ગામની મુલાકાત લીધી હતી. પ્રાથમિક તપાસમાં અધિકારીઓને મેલિયોઈડોસિસ નામના ગંભીર બેક્ટેરિયલ ઈન્ફેક્શનની શંકા છે. લેબોરેટરી અહેવાલોમાં આ ઈન્ફેક્શનના બે કેસોની પુષ્ટિ પણ થઈ છે.

મેલિયોઈડોસિસ એ બુર્કહોલ્ડેરિયા સ્યુડોમેલેઈ નામના બેક્ટેરિયમથી થતું ઈન્ફેક્શન છે, જે સામાન્ય રીતે માટી અને સ્થિર પાણીમાં જોવા મળે છે, ખાસ કરીને ચોમાસા કે પૂરનાં સમયમાં. સમયસર સારવાર માટે લાંબા કોર્સના એન્ટિબાયોટિક્સ જરૂરી હોય છે, પરંતુ મોડું નિદાન થવાથી આ બીમારી જીવલેણ સાબિત થઈ શકે છે.

સરકારએ ગામના તમામ 2,500 રહેવાસીઓની વ્યાપક સ્વાસ્થ્ય તપાસ કરવાનો આદેશ આપ્યો છે. ખાસ કરીને ડાયાબિટીસ કે અન્ય સ્વાસ્થ્ય સમસ્યાઓ ધરાવતા લોકોને કિડની, બ્લડ પ્રેશર અને બ્લડ સુગર સંબંધિત ચકાસણીઓ કરવામાં આવશે.

સ્વાસ્થ્ય અધિકારીઓએ જણાવ્યું કે મોટાભાગના મૃત્યુ 55 વર્ષની આસપાસના પુરુષોમાં થયા છે, જેમને પહેલાથી સ્વાસ્થ્ય સંબંધિત સમસ્યાઓ હતી. લક્ષણો શરૂઆતમાં તાવ અને ઉધરસ તરીકે દેખાયા હતા, પરંતુ બાદમાં ફેફસાંને ગંભીર નુકસાન પહોંચાડતા જોવા મળ્યા.