દરાંગ (અસામ): વડાપ્રધાન નરેન્દ્ર મોદીએ રવિવારે આસામના દરાંગ જિલ્લામાં રૂ. 6300 કરોડના હેલ્થકેર અને ઇન્ફ્રાસ્ટ્રક્ચર પ્રોજેક્ટ્સનું શિલાન્યાસ અને ઉદ્ઘાટન કર્યું. તેમણે દરાંગ મેડિકલ કોલેજ એન્ડ હોસ્પિટલ, નર્સિંગ કોલેજ અને જીએનએમ સ્કૂલના બાંધકામની શરૂઆત કરી જેમાં રૂ. 570 કરોડનું રોકાણ થવાનું છે.

જનસભાને સંબોધતા વડાપ્રધાને પોતાને ભગવાન શિવનો ભક્ત ગણાવ્યો અને કહ્યું કે, “કોઈ મને ગમે તેટલી ગાળો આપે, હું બધું ઝેર પચાવી જઉ છું.” કોંગ્રેસ પર કટાક્ષ કરતાં તેમણે કહ્યું કે, “મારું રિમોટ કંટ્રોલ દેશની 140 કરોડ જનતા છે. એ જ મારા માલિક છે. મારી પ્રજા જ મારો ભગવાન છે.”

પીએમ મોદીએ થોડા દિવસ પહેલાં બિહારના દરભંગામાં I.N.D.I.A ગઠબંધનના કાર્યકરો દ્વારા તેમના અને તેમની માતા સામે કરાયેલા અપશબ્દોના વીડિયોને લઈને પણ કોંગ્રેસ પર આક્ષેપ કર્યો. તેમણે કહ્યું કે પ્રજાનું અપમાન તેઓ સહન નહીં કરે, પરંતુ તેઓ શિવભક્ત હોવાને કારણે બધું ઝેર પચાવી લે છે.

આ પ્રસંગે વડાપ્રધાને દરાંગ અને ગોલાઘાટ જિલ્લાઓમાં રૂ. 18530 કરોડના પ્રોજેક્ટ્સનું ઉદ્ઘાટન કર્યું અને આસામની પ્રગતિની પ્રશંસા કરી. તેમણે જણાવ્યું કે આસામ 13 ટકાના વિકાસદર સાથે આગળ વધી રહ્યું છે અને ભાજપની ડબલ એન્જિન સરકારના યોગદાનથી રાજ્ય ઝડપથી વિકસતું બની રહ્યું છે.