નવી દિલ્હીઃ અમેરિકાના રાષ્ટ્રપ્રમુખ ડોનાલ્ડ ટ્રમ્પ દ્વારા ભારતના આયાત ઉત્પાદનો પર વધારાના ટેરિફ લાદવાના દબાણ વચ્ચે ભારતે રશિયાથી ક્રૂડ ઓઈલની ખરીદી ચાલુ રાખવાનો નિર્ણય કર્યો છે. કેન્દ્રીય નાણામંત્રી નિર્મલા સીતારમણે શુક્રવારે સ્પષ્ટતા કરી કે ભારતના ઉર્જા સંબંધિત નિર્ણયો સંપૂર્ણપણે રાષ્ટ્રીય હિતને ધ્યાનમાં રાખીને લેવામાં આવશે.

નાણામંત્રી સીતારમણે મીડિયા ચેનલને આપેલા ઈન્ટરવ્યૂમાં કહ્યું, “ભારત રશિયા પાસેથી તેલ ખરીદવાનું ચાલુ રાખશે. આપણી જરૂરિયાત મુજબ તેલની ખરીદીનું સ્થળ અને માત્રા નક્કી કરવાનો હક માત્ર ભારતીય સરકારનો છે. કિમંત, લોજિસ્ટિક્સ અને દેશની જરૂરિયાતને ધ્યાનમાં રાખીને દરેક નિર્ણય લેવામાં આવશે.”

અમેરિકા 27 ઓગસ્ટથી ભારતીય ઉત્પાદનો પર 50 ટકા વધારાના ટેરિફ લાદી ચૂક્યું છે અને આગામી મહિનાઓમાં વધુ પ્રતિબંધોની સંભાવના દર્શાવી છે. આ અંગે સીતારમણે કહ્યું કે, GST દરોમાં થયેલા સુધારા ટેરિફના દબાણને ઘટાડવામાં મદદરૂપ થશે અને દેશના વ્યાપાર અને ઉદ્યોગને લાભ પહોંચાડશે.