શિલ્પા શેટ્ટીના પતિ અને ઉદ્યોગપતિ રાજ કુન્દ્રા સામેનો ₹60 કરોડનો છેતરપિંડી કેસ વધુ ગંભીર બની રહ્યો છે. મુંબઈ પોલીસની આર્થિક ગુના શાખા (EOW) દ્વારા કરવામાં આવેલી તપાસ દરમિયાન જાણી આવ્યું છે કે આ પૈસામાંથી કેટલાક ફંડ ફિલ્મ નિર્માતા એકતા કપૂર, અભિનેત્રી બિપાશા બાસુ અને નેહા ધુપિયાના ખાતામાં ટ્રાન્સફર થયા હતા.

સૂત્રોના જણાવ્યા મુજબ, EOW ટૂંક સમયમાં આ ત્રણેય સેલિબ્રિટીઓને નોટિસ પાઠવી પૂછપરછ માટે બોલાવી શકે છે અને નાણાકીય વ્યવહારો અંગે વિગતવાર માહિતી માંગશે.

આ કેસ ત્યારે ચર્ચામાં આવ્યો જ્યારે ઉદ્યોગપતિ દીપક કોઠારીએ આરોપ લગાવ્યો કે રાજ કુન્દ્રા અને શિલ્પા શેટ્ટીની કંપનીએ તેમની સાથે ₹60 કરોડની છેતરપિંડી કરી છે. હાલ EOW કંપનીના નાણાકીય રેકોર્ડની તપાસ કરી રહી છે કે ફરિયાદીમાં દર્શાવ્યા મુજબ ભંડોળનો દુરુપયોગ થયો છે કે નહીં.

તાજેતરમાં રાજ કુન્દ્રાની લગભગ પાંચ કલાક પૂછપરછ કરવામાં આવી હતી, જેમાં તેણે નાણાકીય વ્યવહારોની કબૂલાત આપી હતી. આ પૂછપરછ દરમિયાન એકતા કપૂર, નેહા ધુપિયા અને બિપાશા બાસુ સાથે નાણાકીય ટ્રાન્ઝેક્શનના પુરાવા સામે આવ્યા છે, જેનાથી તેમની મુશ્કેલીઓ વધી શકે છે.

આ સમગ્ર મામલો બેસ્ટ ડીલ ટીવી, રાજ કુન્દ્રાની ઈ-કોમર્સ કંપની સાથે જોડાયેલો છે, જે ટીવી પર સેલિબ્રિટી એન્ડોર્સમેન્ટ દ્વારા પ્રોડક્ટ્સ વેચતી હતી. તપાસમાં જાણવા મળ્યું છે કે અનેક બોલિવૂડ સ્ટાર્સે તેમના પ્રોડક્ટ્સ માટે પ્રચાર કર્યો હતો અને કંપની પાસેથી ચુકવણી મેળવી હતી.

હવે EOW જાણવા માંગે છે કે તેમને કઈ સેવાઓ બદલ અને કેટલી રકમ ચૂકવવામાં આવી હતી.

તાજેતરમાં, મુંબઈ પોલીસે રાજ કુન્દ્રા અને શિલ્પા શેટ્ટી સામે લુકઆઉટ નોટિસ પણ જારી કરી છે, જેના કારણે તેમના માટે દેશની બહાર મુસાફરી કરવી મુશ્કેલ બની ગઈ છે.