અભિષેક શર્માએ ફાઈનલ પહેલા કર્યો હતો ટોટકો! બેટ પોતાનું નહીં પણ આ ખેલાડીનું હતું

Abhishek Sharma T20 World Cup 2026: ટી20 વર્લ્ડ કપ 2026ના ફાઈનલ જંગમાં ભારતીય ટીમે ઐતિહાસિક વિજય મેળવીને ખિતાબ પોતાના નામે કર્યો છે. આ જીતનો અસલી હીરો યુવા બેટર અભિષેક શર્મા રહ્યો, જેણે ફાઈનલમાં તોફાની બેટિંગ કરીને ભારતને જીત અપાવવામાં મહત્ત્વની ભૂમિકા ભજવી હતી. રસપ્રદ વાત એ છે કે, આખી ટૂર્નામેન્ટમાં જે ખેલાડીના બેટથી રન નીકળવા મુશ્કેલ હતા અને જે સતત ત્રણ વાર ઝીરો રને આઉટ થયો હતો, તેણે ફાઈનલમાં માત્ર 21 બોલમાં 52 રન ફટકારી દીધા હતા. અભિષેકે પોતાની આ ઈનિંગમાં 3 સિક્સર અને 6 ચોગ્ગા ફટકારીને ભારતનો સ્કોર 255 રન સુધી પહોંચાડ્યો હતો, જેના કારણે ભારતે આ મેચ 96 રને જીતી લીધી હતી.

શિવમ દુબેનું ‘લકી’ બેટ: ઉધાર લીધેલા બેટથી મચાવી ધમાલ

આ શાનદાર પ્રદર્શન બાદ અભિષેક શર્માએ એક મોટો ખુલાસો કર્યો છે. તેણે જણાવ્યું કે ફાઈનલ મેચમાં તે પોતાના નહીં પરંતુ શિવમ દુબેના બેટથી રમી રહ્યો હતો. અભિષેકના જણાવ્યા અનુસાર, ફાઈનલની સવારે તેને લાગ્યું કે આજે કંઈક અલગ કરવું જોઈએ, તેથી તે શિવમ દુબે પાસે ગયો અને તેનું બેટ ઉધાર માંગ્યું. આ ઉધાર લીધેલા બેટથી જ તેણે મેદાનમાં ચોગ્ગા-છગ્ગાની રમઝટ બોલાવી હતી. તેણે જીત બાદ શિવમ દુબેનો આભાર પણ માન્યો હતો.

આ પણ વાંચો: ભારતની જીત પર અમદાવાદ અને દિલ્હી પોલીસના મજેદાર પોસ્ટ વાઈરલ, યુપી પોલીસ જુગલબંધીમાં કૂદી પડી

માત્ર 18 બોલમાં ફિફ્ટી: ટી20 વર્લ્ડ કપ 2026નો સૌથી ઝડપી રેકોર્ડ

આ મેચમાં અભિષેક શર્માએ માત્ર 18 બોલમાં ફિફ્ટી પૂરી કરીને ટી20 વર્લ્ડ કપ 2026ની સૌથી ઝડપી ફિફ્ટી ફટકારવાનો રેકોર્ડ પણ પોતાના નામે કર્યો છે. તેણે સંજુ સેમસન સાથે મળીને 98 રનની ભાગીદારી કરી હતી, જે ભારતની જીતનો પાયો બની હતી. જોકે, આખા ટૂર્નામેન્ટની વાત કરીએ તો અભિષેક માટે આ સફર ઘણી ઉતાર-ચઢાવવાળી રહી હતી. દુનિયાના નંબર 1 બેટર હોવા છતાં આ ટૂર્નામેન્ટમાં તેની એવરેજ માત્ર 17.6ની રહી હતી અને તે ત્રણ વખત ઝીરો પર આઉટ થયો હતો. પરંતુ અંતે ‘મોટા ગજાના ખેલાડી’ તરીકે ફાઈનલમાં તેણે પોતાની ક્ષમતા સાબિત કરી બતાવી.