કાઠમંડુ: નેપાળમાં ચાલી રહેલા હિંસક વિરોધ પ્રદર્શનો વચ્ચે મંત્રીઓ પર હુમલાની ઘટનાઓ વધી રહી છે. તાજેતરમાં પ્રદર્શનકારીઓએ ડેપ્યુટી PM અને નાણા મંત્રી બિષ્ણુ પ્રસાદ પૌડેલ પર કાઠમંડુની ગલીમાં દોડાવી-દોડાવીને હુમલો કર્યો. વાયરલ વીડિયોમાં જોવા મળે છે કે ભીડે તેમને ઘેરી લીધા બાદ એક પ્રદર્શનકારીએ લાત મારી, જેના કારણે તેઓ નીચે પડી ગયા. ત્યારબાદ, ગુસ્સાયેલી ભીડે તેમને ખેંચી લઈ જતી નજરે પડી.

બિષ્ણુ પ્રસાદ પૌડેલ નેપાળ કમ્યુનિસ્ટ પાર્ટી (UML)ના ઉપાધ્યક્ષ અને વરિષ્ઠ નેતા છે. તેઓ અનેક વખત કેન્દ્રમાં મહત્વના મંત્રાલયોની જવાબદારી સંભાળી ચૂક્યા છે. ત્રીજા દહલ કેબિનેટમાં તેમણે નાણા મંત્રાલય સાથે ડેપ્યુટી પ્રાઇમ મિનિસ્ટર તરીકે કાર્યભાર સંભાળ્યો હતો. ભૂતકાળમાં તેઓ ગૃહ, ઉદ્યોગ, જળ અને સંરક્ષણ મંત્રાલયના વડા પણ રહી ચૂક્યા છે.

આ વચ્ચે, પ્રધાનમંત્રી કે.પી. શર્મા ઓલીએ આર્મી ચીફ અશોક સિગ્ડેલના દબાણ બાદ પદ પરથી રાજીનામું આપી દીધું છે. સેનાએ સ્પષ્ટપણે કહ્યું હતું કે ઓલીએ સત્તા છોડ્યા વગર દેશમાં શાંતિ પુનઃસ્થાપિત થઈ શકશે નહીં.

હાલ નેપાળમાં તણાવપૂર્ણ પરિસ્થિતિ છે. પ્રદર્શનકારીઓએ દેશભરમાં આગચંપી, લૂંટફાટ અને સરકારી મકાનો પર હુમલાની ઘટનાઓ સર્જી છે. અનેક મંત્રીઓના નિવાસસ્થાનોને નિશાન બનાવાયા છે. સ્થિતિ બેકાબૂ બનતાં સેનાએ મંત્રીઓને હેલિકોપ્ટર મારફતે સુરક્ષિત સ્થળે ખસેડવાની કાર્યવાહી શરૂ કરી છે.