‘એક્શનમાં કંઇ ખોટું નથી..’, પાકિસ્તાનના બોલર ઉસ્માન તારિકને ભારતીય દિગ્ગજની ‘ક્લિનચીટ’

Ind vs Pak Match Usman Tariq News : ભારત અને પાકિસ્તાન વચ્ચે કોલંબોના આર. પ્રેમદાસા સ્ટેડિયમમાં રમાનારા હાઈવોલ્ટેજ મુકાબલા પહેલા પાકિસ્તાની સ્પિનર ઉસ્માન તારિક તેના અજીબોગરીબ બોલિંગ એક્શનને કારણે ચર્ચાનું કેન્દ્ર બન્યો છે. આ વિવાદ વચ્ચે ભારતના પૂર્વ સુકાની અને દિગ્ગજ બેટ્સમેન સુનીલ ગાવસ્કરે મોટું નિવેદન આપીને તારિકને ક્લીન ચીટ આપી છે.

વિવાદનું કારણ અને નિષ્ણાતોના મંતવ્યો:

અનોખી શૈલી: 28 વર્ષીય ઓફ-સ્પિનર ઉસ્માન તારિક બોલ ફેંકતા પહેલા સહેજ અટકે છે અને તેની કોણી અત્યંત લવચીક છે, જેની સરખામણી શ્રીલંકન દિગ્ગજ મુથૈયા મુરલીધરન સાથે કરવામાં આવી રહી છે.

ગાવસ્કરનું વલણ: ગાવસ્કરે સ્પષ્ટ કર્યું કે, “બોલરના અટકીને બોલ ફેંકવા પર કોઈ પ્રતિબંધ નથી. જેમ બેટ્સમેન બોલરના બોલ ફેંકતા પહેલા મૂવમેન્ટ કરી શકે છે, તેમ બોલર પણ પોતાની રિધમ બદલી શકે છે.” તેમણે ઉમેર્યું કે ઘણા લોકો નિયમો સમજ્યા વગર નિવેદનો આપી રહ્યા છે.

અશ્વિન અને અમ્પાયરનું સમર્થન: ભારતીય સ્પિનર આર. અશ્વિન અને પૂર્વ આંતરરાષ્ટ્રીય અમ્પાયર અનિલ ચૌધરીએ પણ તારિકના એક્શનને સંપૂર્ણપણે કાયદેસર અને આઈસીસીના દિશા-નિર્દેશો મુજબ ગણાવ્યું છે.

ભારતીય બેટ્સમેનો માટે ગાવસ્કરની સલાહ

ગાવસ્કરે ભારતીય બેટ્સમેનોને આશ્વસ્ત કરતા કહ્યું કે, પાકિસ્તાની બેટ્સમેનોને પણ પ્રેક્ટિસ સેશનમાં તારિકને રમવામાં કોઈ ખાસ મુશ્કેલી પડી નથી, તેથી ભારતીય બેટ્સમેનોએ પણ વધારે ચિંતા કરવાની જરૂર નથી. તેમણે સલાહ આપી કે બેટ્સમેનોએ બોલરની ‘મિસ્ટ્રી’ કરતા પોતાના શૉટ સિલેક્શન પર વધુ ધ્યાન આપવું જોઈએ. જો બેટ્સમેન સીધા બેટે રમશે તો વધુ સફળ થશે, ખોટા શૉટ રમવાથી આઉટ થવાની શક્યતા વધી જાય છે.

ઉસ્માન તારિકનો ટ્રેક રેકોર્ડ

ઉસ્માન તારિકે અત્યાર સુધી 4 ટી20 આંતરરાષ્ટ્રીય મેચોમાં 11 વિકેટ ઝડપી છે. સૌથી મહત્વની વાત એ છે કે તેનો ઈકોનોમી રેટ માત્ર 5.93 રહ્યો છે, જે ટી20 ફોર્મેટમાં અત્યંત પ્રભાવશાળી માનવામાં આવે છે. 15 ફેબ્રુઆરીએ રમાનારી ભારત-પાક મેચમાં ઉસ્માન તારિક પાકિસ્તાન માટે ‘ટ્રમ્પ કાર્ડ’ સાબિત થાય છે કે ભારતીય બેટ્સમેનો તેને સરળતાથી રમે છે, તે જોવું રસપ્રદ રહેશે.