અમેરિકાના પ્રખ્યાત કન્ઝર્વેટિવ યુથ ગ્રુપ ‘ટર્નિંગ પોઇન્ટ યુએસએ’ના સીઈઓ અને કો-ફાઉન્ડર ચાર્લી કર્કની બુધવારે યુટા વેલી યુનિવર્સિટીમાં યોજાયેલી એક ડિબેટ ઈવેન્ટ દરમિયાન ગોળી મારીને હત્યા કરી દેવામાં આવી હતી.

ચાર્લી કર્ક રાષ્ટ્રપતિ ડોનાલ્ડ ટ્રમ્પના ખૂબ નજીકના સાથી ગણાતા હતા. ઘટના બાદ ટ્રમ્પે સોશિયલ મીડિયા પર પોસ્ટ કરીને ચાર્લીના મૃત્યુની પુષ્ટિ કરી હતી અને સમગ્ર અમેરિકામાં રાષ્ટ્રીય ધ્વજને અડધી કાઠીએ ફરકાવવાનો આદેશ આપ્યો હતો.

અહેવાલો અનુસાર, ડિબેટ દરમિયાન કર્ક બોલી રહ્યા હતા ત્યારે અચાનક ગોળીબાર થયો, જેના કારણે તેઓ ગંભીર રીતે ઘાયલ થયા હતા અને તેમને તાત્કાલિક હોસ્પિટલમાં ખસેડવામાં આવ્યા હતા, જ્યાં તેમનું મૃત્યુ થયું હતું.

અધિકારીઓએ જણાવ્યું છે કે એક શંકાસ્પદ વ્યક્તિને અટકાયત કરવામાં આવી છે, પરંતુ તેની ઓળખ હજુ સુધી જાહેર કરવામાં આવી નથી. ઘટનાથી પહેલાં જ યુનિવર્સિટીમાં કર્કની હાજરીનો વિરોધ થઈ રહ્યો હતો અને એક ઓનલાઈન અરજી દ્વારા કાર્યક્રમ રદ કરવાની માંગ કરવામાં આવી હતી, જેમાં લગભગ 1,000 લોકોના હસ્તાક્ષર હતાં. તેમ છતાં યુનિવર્સિટી પ્રશાસને કાર્યક્રમ રદ ન કરવાની જાહેરાત કરી હતી અને જણાવ્યું હતું કે આ કાર્યક્રમ સ્વતંત્ર ચર્ચા અને વાણી સ્વતંત્રતાનો ભાગ છે.

ટ્રમ્પે સોશિયલ મીડિયા પર પોસ્ટ કરીને લખ્યું હતું કે, “ગ્રેટ અને લેજન્ડરી ચાર્લી કર્ક હવે આપણી વચ્ચે નથી. અમેરિકાના યુવાનોને તેનાથી વધુ કોઈ સમજી શક્યું નથી. મેલાનિયા અને હું તેમની પત્ની એરિકા અને પરિવાર પ્રત્યે ઊંડો શોક વ્યક્ત કરીએ છીએ. ચાર્લી, અમે તમને પ્રેમ કરીએ છીએ.”