6,6,6,6,6,6… યુવરાજથી પહેલા દિગ્ગજ ક્રિકેટર ફટકારી ચૂક્યો હતો એક ઓવરમાં છ છગ્ગા

Herschelle Gibbs: જ્યારે પણ એક ઓવરમાં છ છગ્ગાની વાત આવે ત્યારે આપણા મનમાં સૌથી પહેલું નામ યુવરાજ સિંહનું આવે છે પરંતુ તેના પહેલા એક દિગ્ગજ ક્રિકેટર આ કારનામું કરી ચૂક્યો છે. 16 માર્ચનો દિવસ ક્રિકેટ ઈતિહાસના યાદગાર દિવસોમાંથી એક છે. 19 વર્ષ પહેલાં એટલે કે વર્ષ 2007માં આ જ દિવસે દક્ષિણ આફ્રિકાના બેટ્સમેન હર્શલ ગિબ્સે ઈતિહાસ રચ્યો હતો. ગિબ્સે નેધરલેન્ડ્સ સામેની વનડે વર્લ્ડ કપ મેચ દરમિયાન એક ઓવરમાં છ છગ્ગા ફટકાર્યા હતા. ઈન્ટરનેશનલ ક્રિકેટમાં આ પહેલી વાર હતું જ્યારે કોઈ બેટ્સમેને એક ઓવરમાં છ છગ્ગા ફટકાર્યા હોય.

ક્રિકેટ ઈતિહાસની સૌથી યાદગાર ક્ષણ

સેન્ટ કિટ્સના વોર્નર પાર્કમાં રમાયેલી આ મેચ ક્રિકેટ ઈતિહાસની સૌથી યાદગાર ક્ષણોમાં સામેલ છે. નેધરલેન્ડ્સના પાર્ટ-ટાઇમ લેગ-સ્પિનર ​​ડેન વેન બંજ (Daan van Bunge)  બોલિંગ કરી રહ્યો હતો, પરંતુ ગિબ્સ સામે તે બિનઅસરકારક રહ્યો. ગિબ્સે 30મી ઓવરમાં સતત છ બોલમાં છ છગ્ગા ફટકારીને દર્શકોને રોમાંચિત કરી દીધા હતા. નાના મેદાનમાં બોલ વારંવાર સ્ટેન્ડમાં ગયો અને તે ઓવર ક્રિકેટ ઈતિહાસની અમર ક્ષણ બની ગઈ. 

ગિબ્સ સામે તમામ બોલર લાચાર

આ ઓવરને લઈને નેધરલેન્ડ્સના કેપ્ટન લૂક વેન ટ્રોસ્ટે રમૂજ અંદાજમાં કહ્યું હતું કે, ‘ડેન વેન બંજે કેટલાક સારા બોલ પણ ફેંક્યા અને કેટલાક ખૂબ જ ખરાબ પણ ફેંક્યા. પરંતુ તે દિવસે ગિબ્સ સામે કોઈ પણ બોલરનું ટકી રહેવું લગભગ અશક્ય હતું.’

ઐતિહાસિક ઈનિંગ્સની અસર

હર્શલ ગિબ્સની આ ઐતિહાસિક ઈનિંગ્સની અસર એટલી મોટી હતી કે, ટુર્નામેન્ટના સ્પોન્સર જોની વોકરને પણ ચેરિટી માટે મોટી રકમ આપવી પડી. આમ ગિબ્સનું આ પરાક્રમ માત્ર રેકોર્ડ બુકમાં જ નહીં પરંતુ ક્રિકેટ ચાહકોની યાદોમાં પણ હંમેશા માટે અંકિત થઈ ગયું. 

દક્ષિણ આફ્રિકાનો મોટો સ્કોર

વરસાદને કારણે આ મેચને 40-40 ઓવરની કરી દેવામાં આવી હતી. આ મેચમાં દક્ષિણ આફ્રિકાએ 3 વિકેટ પર 353 રન બનાવ્યા હતા. જેક્સ કેલિસે સૌથી વધુ અણનમ 128 રન બનાવ્યા હતા. વિકેટકીપર-બેટ્સમેન માર્ક બાઉચરે અણનમ 75 રન બનાવ્યા હતા અને હર્શલ ગિબ્સે 72 રનનું યોગદાન આપ્યું હતું.

નેધરલેન્ડ્સની 221 રનથી કારમી હાર

જવાબમાં નેધરલેન્ડ્સ નિર્ધારિત ઓવરોમાં 9 વિકેટ પર માત્ર 132 રન જ બનાવી શક્યું અને મેચ 221 રનથી હારી ગયું. રયાન ટેન ડોશેટે સૌથી વધુ 57 રન બનાવ્યા હતા. દક્ષિણ આફ્રિકા માટે જસ્ટિન કેમ્પે સૌથી વધુ 2 વિકેટ ઝડપી હતી. 

આ પણ વાંચો: LIVE: દુબઈ એરપોર્ટ પર ડ્રોન હુમલો, કુવૈતમાં પણ એટેક; ટ્રમ્પનો દાવો – ‘ઈરાનની શક્તિ ખતમ કરી દીધી’

હર્શલ ગિબ્સ બાદ યુવરાજ સિંહ (ભારત), કીરોન પોલાર્ડ (વેસ્ટ ઈન્ડિઝ), જસકરણ મલ્હોત્રા (યુએસએ) અને દીપેન્દ્ર સિંહ એરી (નેપાળ) એ પણ આંતરરાષ્ટ્રીય મેચ દરમિયાન એક ઓવરમાં સતત 6 છગ્ગા ફટકાર્યા છે. જોકે, ગિબ્સ સિવાય અન્ય કોઈ બેટ્સમેન વનડે વર્લ્ડ કપમાં આ સિદ્ધિ હાંસલ નથી કરી શક્યો. 

એક ઓવરમાં 6 છગ્ગા ફટકારનાર ખેલાડી (ઈન્ટરનેશનલ ક્રિકેટ)

હર્શલ ગિબ્સ vs નેધરલેન્ડ્સ, વનડે વર્લ્ડ કપ 2007 (બોલર: ડેન વેન બંજ)

યુવરાજ સિંહ vs ઈંગ્લેન્ડ, T20 વર્લ્ડ કપ 2007 (બોલર: સ્ટુઅર્ટ બ્રોડ)

કીરોન પોલાર્ડ vs શ્રીલંકા, T20I 2021 (બોલર: અકિલા ધનંજય)

જસ્કરન મલ્હોત્રા vs પાપુઆ ન્યુ ગિની, વનડે 2021 (બોલર: ગૌડી ટોકા)

દીપેન્દ્ર સિંહ એરી vs કતાર, T20I 2024 (બોલર: કામરાન ખાન)