Harbhajan Singh Security Withdraws By Punjab Government: આમ આદમી પાર્ટી (AAP)માં મોટા ભંગાણ વચ્ચે પંજાબની ભગવંત માન સરકારે પૂર્વ ક્રિકેટર અને રાજ્યસભા સાંસદ હરભજન સિંહની સિક્યોરિટી પાછી ખેંચી લીધી છે. આ પગલું એવા સમયે લેવામાં આવ્યું છે જ્યારે એવી ચર્ચાઓ જોર પકડ્યું છે કે ‘ટર્બનેટર’ ટૂંક સમયમાં જ AAPને અલવિદા કહીને કેસરીયો ધારણ કરી શકે છે.

પંજાબ સરકારે હરભજન સિંહની સિક્યોરિટી પાછી ખેંચી

હરભજન સિંહના અંગત સચિવ (PA) મનદીપ સિંહે જણાવ્યું કે, પંજાબ સરકારે અચાનક કાર્યવાહી કરતા તેમની સંપૂર્ણ પોલીસ સિક્યોરિટી પાછી ખેંચી લીધી છે. પ્રાપ્ત માહિતી પ્રમાણે હરભજન સિંહના નિવાસસ્થાનની બહાર તહેનાત અંદાજે 9 થી 10 જવાનોનો પહેરો હટાવી દેવામાં આવ્યા છે અને તેમને ફાળવવામાં આવેલી સરકારી પાયલટ કાર પણ પાછી લઈ લેવામાં આવી છે.

આમ આદમી પાર્ટીમાં મોટું ભંગાણ

આ સમગ્ર ઘટનાક્રમનાં મૂળિયા એ દાવામાં છુપાયેલા છે જે તાજેતરમાં જ ભાજપમાં સામેલ થયેલા રાઘવ ચઢ્ઢાએ કર્યા છે. રાઘવ ચઢ્ઢાએ કહ્યું હતું કે, આમ આદમી પાર્ટીના 10 રાજ્યસભા સાંસદોમાંથી 7 સાંસદો પાર્ટી છોડી રહ્યા છે અને ભાજપના સંપર્કમાં છે. આ 7 સંભવિત ચહેરાઓમાં હરભજન સિંહનું નામ પ્રમુખતાથી લેવામાં આવી રહ્યું છે. જોકે, હરભજન સિંહે આ પક્ષપલટા અંગે અત્યાર સુધી મૌન સાધ્યું છે, પરંતુ સુરક્ષા પરત ખેંચી લેવી એ સરકારની નારાજગીનો સ્પષ્ટ સંકેત માનવામાં આવી રહ્યો છે.

હરભજન સિંહના ઘરની બહાર લખાયું ‘ગદ્દાર’

આ પહેલા શનિવારે હરભજન સિંહના નિવાસસ્થાનની બહાર કાળા રંગથી ‘પંજાબનો ગદ્દાર’ લખવામાં આવ્યું હતું. આ ઘટનાનો વીડિયો પણ વાઈરલ થયો છે, જેમાં કેટલાક લોકો બ્લેક સ્પ્રે પેન્ટથી ‘ગદ્દાર’ લખી રહ્યા છે. ચોંકાવનારી વાત એ છે કે પોલીસ ત્યાં જ હાજર હોવા છતાં તેઓને રોકવાનો કે હટાવવાનો કોઈ ખાસ પ્રયાસ નહોતો કર્યો. 

આમ આદમી પાર્ટીના કાર્યકર્તાઓનું વિરોધ પ્રદર્શન

શનિવારે આમ આદમી પાર્ટીના કાર્યકર્તાઓએ કાળી પટ્ટી પહેરીને વિરોધ પ્રદર્શન કર્યું હતું. પંજાબના મુખ્યમંત્રી ભગવંત માને પાર્ટી છોડનારા સાંસદો પર આકરા પ્રહારો કર્યા હતા અને તેમને ‘ગદ્દાર’ ગણાવ્યા હતા. ચંદીગઢમાં એક પ્રેસ કોન્ફરન્સ દરમિયાન તેમણે કહ્યું હતું કે, ‘આ નેતાઓએ માત્ર પાર્ટીના જ નહીં, પરંતુ પંજાબના લોકોના વિશ્વાસને પણ ઠેસ પહોંચાડી છે.’

આ પણ વાંચો: પંજાબમાં પક્ષપલટા પર સંગ્રામ: હરભજન સિંહના ઘરની બહાર લખાયું ‘ગદ્દાર’, CM ભગવંત માને ભાજપની ઝાટકણી કાઢી

ભગવંત માનના ભાજપ પર પ્રહાર

ભગવંત માને આરોપ લગાવ્યો છે કે, ‘ભાજપને પંજાબ અને પંજાબીઓ સાથે સમસ્યા છે. ભાજપ પંજાબના લોકોના હિતમાં હોય તેવી કોઈપણ બાબતમાં અવરોધ ઉભો કરવાનો પ્રયાસ કરે છે. આમ આદમી પાર્ટી કોઈ એક વ્યક્તિ કરતાં મોટી છે અને કેટલાક લોકોના જવાથી પાર્ટી કે પંજાબના રાજકારણ પર કોઈ ખાસ અસર નહીં પડશે.’

Vaibhav Suryavanshi Hamstring Injury Update: આઈપીએલ 2026 માં રાજસ્થાન રોયલ્સ (RR) માટે શાનદાર ફોર્મમાં ચાલી રહેલા યુવા ઓપનર વૈભવ સૂર્યવંશીની ફિટનેસને લઈને ચિંતાના વાદળો છવાયા છે. સનરાઇઝર્સ હૈદરાબાદ (SRH) સામેની મેચમાં તોફાની સદી ફટકાર્યા બાદ, ફિલ્ડિંગ દરમિયાન વૈભવને હેમસ્ટ્રિંગની તકલીફ થતા તે મેદાનની બહાર જતો રહ્યો હતો.

શું છે ઈજાની સ્થિતિ?

મેચના ત્રીજા ઓવર દરમિયાન ફિલ્ડિંગ કરતી વખતે વૈભવને હેમસ્ટ્રિંગમાં ખેંચાણ અનુભવાયું હતું. તે લંગડાતા ચાલતો જોવા મળ્યો અને ફિઝિયોની મદદથી મેદાનની બહાર જવું પડ્યું હતું. બેટિંગ કોચ વિક્રમ રાઠોરે રાહત આપતા જણાવ્યું કે, વૈભવની ઈજા હાલ ગંભીર જણાતી નથી, પરંતુ તેની સંપૂર્ણ સ્થિતિ આગામી એક-બે દિવસમાં સ્પષ્ટ થશે.

PBKS સામેની મેચમાં રમશે કે નહીં?

રાજસ્થાન માટે ચિંતાની વાત એ છે કે, 28 એપ્રિલે તેમનો સામનો અત્યારે અજેય ફોર્મમાં રહેલી પંજાબ કિંગ્સ (PBKS) સામે છે. પંજાબ સતત 6 મેચ જીતીને પોઈન્ટ ટેબલમાં ટોચ પર છે. જો વૈભવ ફિટ નહીં થાય તો રાજસ્થાને પોતાના ઓપનિંગ કોમ્બિનેશનમાં ફેરફાર કરવો પડશે.

આ પણ વાંચો: દિલ્હી એરપોર્ટ પર 232 મુસાફરોના જીવ તાળવે ચોંટ્યા, વિમાનનું લેન્ડિંગ ગિયર ફેલ થતાં આગ

વૈભવની જગ્યાએ કોણ લેશે એન્ટ્રી?

જો વૈભવ સૂર્યવંશી પંજાબ સામેની મેચ ગુમાવે છે, તો ટીમ પાસે બે મુખ્ય વિકલ્પો છે. 

1. અમન રાવ પેરાલા – 21 વર્ષીય અમન રાવ ડેબ્યૂ કરી શકે છે. વિજય હજારે ટ્રોફીમાં બેવડી સદી ફટકારી ચૂકેલા અમન પાસે 162 નો શાનદાર સ્ટ્રાઈક રેટ છે.

2. લુઆન-ડ્રે પ્રિટોરિયસ – જો ટીમ વિદેશી ખેલાડીને ઓપનિંગમાં લાવવા માંગતી હોય, તો પ્રિટોરિયસને મોકો મળી શકે છે, પણ તેના માટે શિમરોન હેટમાયરને ટીમમાંથી બહાર બેસાડવો પડી શકે છે.

વૈભવ ટીમ માટે ખુબ જ મહત્વપુર્ણ

રાજસ્થાન રોયલ્સ માટે આ મેચ જીતવી અનિવાર્ય છે, કારણ કે હૈદરાબાદ સામે 229 રન બનાવ્યા હોવા છતાં ટીમ તેનો બચાવ કરી શકી નહોતી. હવે જોવાનું એ રહેશે કે શું યુવા વૈભવ સમયસર રિકવર થઈને મેદાનમાં પરત ફરે છે કે નહીં.

Vaibhav Suryavanshi IPL 2026 Century: ક્રિકેટના મેદાન પર જ્યારે હુનર અને હોસલો ભેગા થાય છે, ત્યારે માત્ર રન નથી બનતા, ઇતિહાસ રચાય છે. આઈપીએલ 2026માં શનિવારનો દિવસ વૈભવ સૂર્યવંશીના નામે રહ્યો. પોતાની વિસ્ફોટક બેટિંગથી સદી ફટકાર્યા બાદ વૈભવે જે રીતે ઉજવણી કરી, તેણે કરોડો ક્રિકેટ પ્રેમીઓના દિલ જીતી લીધા છે. સોશિયલ મીડિયા પર અત્યારે તેના હાર્ટ અને સેલ્યુટ સેલિબ્રેશનની સૌથી વધુ ચર્ચા થઈ રહી છે.

પહેલા જ બોલથી આક્રમક અંદાજ

મેચની શરૂઆતથી જ વૈભવના ઈરાદા સ્પષ્ટ હતા. મેદાનની ચારેબાજુ આકર્ષક શોટ્સ ફટકારીને તેણે સાબિત કરી દીધું કે, શા માટે તેને ભારતીય ક્રિકેટનો આગામી સુપરસ્ટાર માનવામાં આવે છે. જ્યાં અનુભવી બેટ્સમેનો સંઘર્ષ કરી રહ્યા હતા, ત્યાં વૈભવે નીડરતાથી બોલરો પર પ્રભુત્વ જમાવ્યું હતું.

સદી સાથે આપ્યો ખાસ સંદેશ

એક સુંદર કવર ડ્રાઈવ સાથે જ્યારે વૈભવે પોતાની સદી પૂરી કરી, ત્યારે આખું સ્ટેડિયમ ગુંજી ઉઠ્યું હતું. આ માત્ર 100 રન નહોતા, પણ તેની સખત મહેનત અને મોટા મંચ પર પોતાને સાબિત કરવાનો પુરાવો હતો.

આ પણ વાંચો : સ્થાનિક સ્વરાજની ચૂંટણી LIVE : 1 કલાકમાં સરેરાશ 5% મતદાન, ગોધરામાં મતદાન મથકે આગ, અનેક જગ્યાએ EVM ખોટકાયાં

દિલ જીતી લેનારું હાર્ટ સેલિબ્રેશન

સદી પૂરી કર્યા બાદ વૈભવે હેલ્મેટ ઉતાર્યું અને બંને હાથે હવામાં હાર્ટ બનાવ્યું. આ ઈશારો તેના એ ફેન્સ માટે હતો જેમણે દરેક મુશ્કેલ સમયમાં તેને સપોર્ટ કર્યો છે. આ સેલિબ્રેશન દર્શાવે છે કે વૈભવ માત્ર પોતાના માટે નહીં, પણ તેને ચાહનારા લોકોના પ્રેમ માટે રમે છે.

સેલ્યુટમાં દેખાયા સંસ્કાર અને સન્માન

હાર્ટ સેલિબ્રેશન બાદ વૈભવે ગર્વ સાથે સેલ્યુટ કરી હતી. આ સલામી તેના માતા-પિતા, કોચ અને તે તમામ લોકો માટે હતી જેમણે તેને આ મુકામ સુધી પહોંચાડવામાં મદદ કરી છે. મેદાન પર હાજર સિનિયર ખેલાડીઓએ પણ વૈભવની આ વિનમ્રતા અને શિસ્તના વખાણ કર્યા હતા.

દિગ્ગજો પણ થયા પ્રભાવિત

કમેન્ટ્રી બોક્સમાં બેઠેલા નિષ્ણાતોએ જણાવ્યું કે, આટલી નાની ઉંમરે આવો સંયમ અને ભાવનાત્મક સંતુલન બહુ ઓછા ખેલાડીઓમાં જોવા મળે છે. વિરોધી ટીમના ખેલાડીઓએ પણ આગળ આવીને વૈભવની પીઠ થાબડી હતી. આજના આક્રમક સેલિબ્રેશનના યુગમાં, વૈભવ સૂર્યવંશીનું આ સાદગીભર્યું હાર્ટ અને સેલ્યુટ સેલિબ્રેશન રમતગમત જગતમાં એક ઊંડો સંદેશ આપી ગયું છે.

Image Source: Twitter

New Zealand’s Cricketer Doug Bracewell: ન્યુઝીલેન્ડના પૂર્વ ઓલરાઉન્ડર ડગ બ્રેસવેલ (Doug Bracewell) ફરી એકવાર વિવાદમાં ફસાયો છે. સપ્ટેમ્બર 2025માં થયેલા રુટીન ડ્રગ ટેસ્ટમાં ફેલ થયા બાદ હવે તેના પર બે વર્ષનો બૅન લગાવી દેવામાં આવ્યો છે. આ સસ્પેન્શન 24 નવેમ્બર, 2025થી અમલમાં માનવામાં આવે છે અને 23 નવેમ્બર, 2027 સુધી ચાલુ રહેશે.

કોકેઈનનું સેવન કર્યું હોવાની કબૂલાત 

બ્રેસવેલે ડિસેમ્બર 2025માં ઈન્ટરનેશનલ અને ડોમેસ્ટિક ક્રિકેટમાંથી નિવૃત્તિની જાહેરાત કરી હતી, પરંતુ તે પહેલા જ તેનો કેસ સામે આવી ચૂક્યો હતો. તેણે ચેમ્સફોર્ડમાં એસેક્સ અને સમરસેટ વચ્ચે રમાયેલી એસેક્સ માટે કાઉન્ટી ચેમ્પિયનશિપ મેચ દરમિયાન કોકેઈનનું સેવન કર્યું હોવાની કબૂલાત કરી હતી.

મેચના થોડા કલાકો પહેલા પ્રતિબંધિત પદાર્થનું સેવન

પ્રાપ્ત માહિતી પ્રમાણે બ્રેસવેલે પ્રથમ દિવસની રમત પછી અને બીજા દિવસની રમતના થોડા કલાકો પહેલા પ્રતિબંધિત પદાર્થનું સેવન કર્યું હતું. આમ છતાં તેણે મેચમાં ભાગ લીધો હતો. પ્રથમ ઈનિંગમાં બે વિકેટ લીધી, બેટિંગમાં 18 બોલ સુધી ખાતું નહોતો ખોલી શક્યો અને બીજી ઈનિંગમાં એક વિકેટ ઝડપી. આ મેચમાં એસેક્સે 7 વિકેટથી જીત હાંસલ કરી હતી. 

ઈંગ્લેન્ડના ક્રિકેટ નિયમનકારે આ બાબતને ગંભીરતાથી લીધી અને બ્રેસવેલ પર બે વર્ષનો પ્રતિબંધ લગાવી દીધો છે. એસેક્સે પણ એક સત્તાવાર નિવેદન જારી કરીને કહ્યું કે, ક્લબ આ નિર્ણયને સમર્થન કરે છે.

ક્લબે સ્પષ્ટ કર્યું કે તમામ ખેલાડીઓ પાસેથી પ્રોફેશનલ આચરણના ઉચ્ચતમ ધોરણોની અપેક્ષા રાખવામાં આવે છે, જોકે તેઓએ એમ પણ કહ્યું કે, ‘અમે બ્રેસવેલને રિહેબિલિટેશનમાં સપોર્ટ કરીશું.’

અગાઉ પણ વિવાદોમાં રહ્યો છે બ્રેસવેલ

બ્રેસવેલનો આ પહેલો વિવાદ નથી. આ પહેલા પણ તેનો રેકોર્ડ વિવાદોથી ભરેલો રહ્યો છે. 2014માં તેણે ન્યુઝીલેન્ડની T20 ઈવેન્ટ સુપર સ્મેશ દરમિયાન કોકેઈન ટેસ્ટમાં ફેલ થવા બદલ એક મહિનાનો પ્રતિબંધ ભોગવી ચૂક્યો છે. તેને 2017માં ડ્રિંક એન્ડ ડ્રાઈવ કેસમાં દોષિત ઠેરવવામાં આવ્યો હતો અને ત્યાં તેને 100 કલાકની કમ્યુનિટી સર્વિસની સજા મળી હતી. તે સમયે તેની કારમાં દારૂનું પ્રમાણ માન્ય મર્યાદા કરતા ત્રણ ગણું હતું. 2012માં નેપિયર બારમાં ઝઘડાના કારણે તેને એક મેચનો પ્રતિબંધનો સામનો કરવો પડ્યો હતો. તે સમયે તેની સાથે જેસી રાયડર પણ હાજર હતો.

આ પણ વાંચો: મરજીથી ત્યાં ગયા હતા…, રશિયામાં ભારતના 10 યુવાનોના મોત મામલે સુપ્રીમ કોર્ટમાં સરકારનો જવાબ

બ્રેસવેલનું કરિયર જ્યાં મેદાન પરના પ્રદર્શન માટે યાદ કરવામાં આવે છે, ત્યારે બીજી તરફ મેદાનની ઓફ-ફીલ્ડ વિવાદોએ પણ તેને સતત હેડલાઈન્સમાં રાખ્યો છે. હવે આ નવો પ્રતિબંધ તેના કરિયરના અંત પર વધુ એક મોટો ડાઘ બનીને સામે આવ્યો છે. 

Image Source: Twitter

IPL 2026: દિલ્હી કેપિટલ્સને IPL 2026 વચ્ચે એક મોટી રાહત મળી છે. ટીમના સ્ટાર ઓસ્ટ્રેલિયન ફાસ્ટ બોલર મિચેલ સ્ટાર્ક આખરે દિલ્હી કેમ્પમાં જોડાઈ ગયો છે. ઈજાને કારણે ભલે તેની વાપસીમાં વિલંબ થયો, પરંતુ હવે ફ્રેન્ચાઈઝીને સીઝનના મહત્વપૂર્ણ તબક્કા પહેલા મોટી મજબૂતી મળી છે. 

મિચેલ સ્ટાર્ક ખભા અને કોણીની ઈજાઓથી પીડાઈ રહ્યો હતો

સ્ટાર્ક IPL 2026ની શરૂઆતથી જ ખભા અને કોણીની ઈજાઓથી પીડાઈ રહ્યો હતો. આ સમસ્યા એશિઝ સીરિઝ દરમિયાન વર્કલોડ (153 ઓવરથી વધુ)ના કારણે વધી ગઈ હતી. ત્યારબાદ જાન્યુઆરીના અંતમાં બિગ બેશ લીગમાં કેચ પકડવાનો પ્રયાસ કરતી વખતે પડી જવાથી ઈજા વધુ ગંભીર બની ગઈ. ફેબ્રુઆરીમાં જ્યારે તેણે બોલિંગ કરવાનો પ્રયાસ કર્યો, ત્યારે દુ:ખાવો ચાલુ રહ્યો, જેના કારણે તેને સિડનીમાં લાંબુ રિહેબ કરાવવું પડ્યું.

ક્રિકેટ ઓસ્ટ્રેલિયાએ મિચેલ સ્ટાર્કને ફિટ જાહેર કર્યો

આખરે 23 એપ્રિલ, 2026ના રોજ ક્રિકેટ ઓસ્ટ્રેલિયાએ તેને ફિટ જાહેર કર્યો, ત્યારબાદ તે દિલ્હી કેમ્પમાં જોડાઈ ગયો. તેની ગેરહાજરીમાં મુકેશ કુમાર, ટી નટરાજન અને લુંગી એનગીડીએ  દિલ્હીના પેસ આક્રમણની જવાબદારી સંભાળી છે. ખાસ કરીને એનગીડીએ 6 મેચમાં 7 વિકેટ લઈને ટીમને મજબૂતી આપી છે. 

IPL 2025માં મિચેલ સ્ટાર્કનું પ્રદર્શન

ગત સીઝનની વાત કરીએ તો સ્ટાર્કે IPL 2025માં દિલ્હી કેપિટલ્સ માટે શાનદાર પ્રદર્શન કર્યું હતું. તેણે 11 મેચમાં 14 વિકેટ લેવા ઉપરાંત તેણે વિશાખાપટ્ટનમમાં સનરાઇઝર્સ હૈદરાબાદ સામે શાનદાર 5/35નો શાનદાર સ્પેલ નાખ્યો હતો. તે દિલ્હી કેપિટલ્સના ઈતિહાસમાં પાંચ વિકેટ લેનાર પ્રથમ વિદેશી ફાસ્ટ બોલર બન્યો હતો. જોકે, તે સીઝન પૂર્ણ કર્યા વિના વર્લ્ડ ટેસ્ટ ચેમ્પિયનશિપ ફાઈનલની તૈયારી માટે ઓસ્ટ્રેલિયા પરત ફર્યો હતો. 

આ પણ વાંચો: હોર્મુઝ સંકટ વચ્ચે નવો ટ્વીસ્ટ! ઓઇલના ભાવ ઘટાડવા હાથ મિલાવશે ટ્રમ્પ-પુતિન? G20 સમિટ પર દુનિયાની નજર

શું PBKS સામે રમશે? 

હવે સૌથી મોટો સવાલ એ છે કે શું સ્ટાર્ક આજે (25 એપ્રિલ) પંજાબ કિંગ્સ સામે રમશે? જવાબ ના છે. ટીમ મેનેજમેન્ટ તેને ઉતાવળમાં મેદાનમાં ઉતારવાના મૂડમાં નથી. લગભગ ત્રણ મહિનાના બ્રેક બાદ તે પહેલા ટ્રેનિંગ અને મેચ ફિટનેસ પર ધ્યાન આપશે. સૂત્રોના જણાવ્યા પ્રમાણે સ્ટાર્ક 1 મેના રોજ રાજસ્થાન રોયલ્સ સામે IPL 2026 પોતાની પહેલી મેચ રમી શકે છે. જો બધું બરાબર રહ્યું તો તે બાકીની લીગ સ્ટેજ મેચો અને પ્લેઓફ માટે ઉપલબ્ધ રહેશે.

Sreesanth vs Harbhajan Singh: IPL ઈતિહાસનો સૌથી મોટો અને ચર્ચિત વિવાદ ‘થપ્પડકાંડ'(Slapgate) લગભગ 18 વર્ષ બાદ ફરી એકવાર ગરમાયો છે. પૂર્વ ભારતીય ફાસ્ટ બોલર એસ. શ્રીસંતે હરભજન સિંહ પર ગંભીર આરોપો લગાવીને ક્રિકેટ જગતમાં ખળભળાટ મચાવી દીધો છે. શ્રીસંતનો દાવો છે કે હરભજન સિંહે આ વિવાદિત ઘટના પર આધારિત એક ટીવી જાહેરાત દ્વારા ₹80 લાખથી ₹1 કરોડ જેટલી મોટી રકમની કમાણી કરી છે. એટલું જ નહીં, શ્રીસંતે એવો પણ ખુલાસો કર્યો કે ભજ્જીએ તેને આ જાહેરાત સોશિયલ મીડિયા પર પ્રમોટ કરવા માટે કહ્યું હતું, જે બાબત તેને જરાય ગમી નહોતી. એક ઇન્ટરવ્યૂમાં શ્રીસંતે આક્રોશ વ્યક્ત કરતા કહ્યું કે, ‘મેં તેમને હંમેશા માફ કર્યા છે પણ હું એ ઘટના ક્યારેય ભૂલી શક્યો નથી, કારણ કે જો તમે ભૂલી જાઓ તો સામેની વ્યક્તિ ફરી એ જ ભૂલ કરે છે.’

IPL 2008નો વિવાદ: પ્રથમ સીઝનમાં જ સર્જાયો હતો ‘થપ્પડકાંડ’

આ વિવાદ વર્ષ 2008માં IPLની પ્રથમ સીઝન દરમિયાન થયો હતો. મુંબઈ ઈન્ડિયન્સ અને કિંગ્સ ઈલેવન પંજાબ વચ્ચેની મેચ બાદ હરભજન સિંહે શ્રીસંતને મેદાન પર જ થપ્પડ મારી દીધી હતી, જેના કારણે શ્રીસંત રડી પડ્યો હતો. આ ઘટના બાદ હરભજન પર આખી સીઝન માટે પ્રતિબંધ મૂકવામાં આવ્યો હતો અને તેમની મેચ ફી પણ કાપી લેવામાં આવી હતી. 

શ્રીસંતે સોશિયલ મીડિયા પર ભજ્જી સાથે તોડ્યા સંબંધ

લાંબા સમય સુધી એવું લાગતું હતું કે બંને વચ્ચે સમાધાન થઈ ગયું છે, પરંતુ હવે શ્રીસંતે સ્પષ્ટ કર્યું છે કે તેમની વચ્ચેના સંબંધો સંપૂર્ણપણે પૂરા થઈ ગયા છે. શ્રીસંતે હરભજનને ઇન્સ્ટાગ્રામ પર બ્લોક કરી દીધો છે અને આરોપ લગાવ્યો છે કે હરભજનની જાહેર છબી અને અસલી વર્તનમાં મોટો તફાવત છે. તેના મતે, ટીવી પર દેખાતી તેમની મિત્રતા માત્ર એક ‘એક્ટ’ એટલે કે દેખાવો હતો.

આ પણ વાંચો: કોહલીનો કેચ 0 પર છોડવો ભારે પડ્યો, 3 ઓવરમાં તો બાઉન્ડ્રી ન ફટકારી, ગિલે જણાવ્યા હારના કારણ

વિવાદનો આર્થિક ફાયદો ઉઠાવ્યાનો શ્રીસંતનો દાવો

તાજેતરમાં પૂર્વ IPL કમિશનર લલિત મોદીએ આ ઘટનાનો હાઈ-ડેફિનેશન વીડિયો જાહેર કરતા આ જૂની આગ ફરી ભભકી ઉઠી છે. જોકે હરભજન સિંહે ભૂતકાળમાં ઘણી વખત આ ઘટના બદલ માફી માંગી છે અને તેને પોતાની મોટી ભૂલ ગણાવી છે, પરંતુ શ્રીસંતનું માનવું છે કે જ્યારે તમે એ જ વિવાદાસ્પદ ઘટનાનો ઉપયોગ આર્થિક ફાયદો મેળવવા માટે કરો છો, ત્યારે માફીનો કોઈ અર્થ રહેતો નથી. આમ, આ નવા ખુલાસાઓએ સ્પષ્ટ કર્યું છે કે IPLના આ સૌથી જૂના વિવાદના ડાઘ હજુ ભૂંસાયા નથી.