T20 વર્લ્ડ કપ 2026 માટે બે નવી ટીમ ક્વોલિફાઈ, હવે ફક્ત એક જ ટીમ માટે જગ્યા રહી

T20 World Cup 2026: નેપાળ અને ઓમાનની ક્રિકેટ ટીમો માટે બુધવાર (15મી ઓક્ટોબર) એક ઐતિહાસિક દિવસ બની રહ્યો. આ બંને ટીમોએ એશિયા એન્ડ એશિયા પેસિફિક ક્વોલિફાયર દ્વારા આગામી ICC મેન્સ T20 વર્લ્ડ કપ 2025 માટે સફળતાપૂર્વક ક્વોલિફાય કરી લીધું છે. આ મેગા ઈવેન્ટ ભારત અને શ્રીલંકામાં યોજાવાની છે. નેપાળ માટે આ સિદ્ધિ વધુ ખાસ છે, કારણ કે તેણે સતત બીજી વખત T20 વર્લ્ડ કપ માટે ક્વોલિફાય કર્યું છે.

ક્વોલિફિકેશન કેવી રીતે નિશ્ચિત થયું?

આઈસીસી (ICC) દ્વારા ઓમાન અને નેપાળના ક્વોલિફિકેશનની પુષ્ટિ સુપર સિક્સ મેચો પહેલા જ કરવામાં આવી છે. સમોઆ સામે UAEની જીત અને ગુરુવારે જાપાન સામેની તેની ટક્કરના પરિણામોને ધ્યાનમાં રાખીને, હવે ગણિત મુજબ ઓમાન અને નેપાળ ટોપ થ્રીમાં પોતાનું સ્થાન નિશ્ચિત કરશે તે નક્કી થઈ ચૂક્યું છે.

નેપાળની ટીમે અત્યાર સુધી ગ્રુપ સ્ટેજમાં પોતાની દરેક મેચ જીતીને પ્રભાવશાળી પ્રદર્શન કર્યું છે. યુએઈ અને કતાર સામે નેપાળે અંતિમ બોલે રોમાંચક વિજય મેળવ્યો હતો. યુએઈ સામેની મેચમાં દીપેન્દ્ર સિંહ એરીએ છેલ્લા બોલે છગ્ગો ફટકારીને ટીમને જીત અપાવી હતી, જે તેના શાનદાર પ્રદર્શનનો પુરાવો છે.

આ પણ વાંચો: ઓસ્ટ્રેલિયાને વનડે પહેલા ઝટકો, સ્ટાર ખેલાડીએ નામ પરત લીધું, ભારત સામેની મેચમાં નહીં રમે

19 ટીમો નક્કી, હવે માત્ર એક સ્થાન બાકી

ઓમાન અને નેપાળના ક્વોલિફાય થવાથી હવે 2025 ટી20 વર્લ્ડ કપમાં ભાગ લેનારી 20 ટીમોમાંથી 19 ટીમો નક્કી થઈ ગઈ છે. ક્વોલિફાયરની ત્રીજી અને અંતિમ જગ્યા માટે હજુ પણ UAE, જાપાન, કતાર અને સમોઆ જેવી ટીમો વચ્ચે સંઘર્ષ ચાલી રહ્યો છે. આ ટૂર્નામેન્ટમાંથી જે ટીમ ટોચના ત્રણમાં સ્થાન મેળવશે, તે ફેબ્રુઆરી-માર્ચમાં ભારત અને શ્રીલંકામાં યોજાનાર ટી20 વર્લ્ડ કપમાં રમવાની તક મેળવશે.

તાજેતરમાં જ આફ્રિકા ક્વોલિફાયર ટીમોની પણ જાહેરાત કરવામાં આવી હતી, જે વર્લ્ડ કપમાં રમશે. હવે આ એશિયા ક્વોલિફાયર દ્વારા બાકીની ટીમોનું ચિત્ર સ્પષ્ટ થતાં, વૈશ્વિક ક્રિકેટ ટૂર્નામેન્ટની તૈયારીઓ વધુ તેજ બનશે.