પાકિસ્તાન ક્રિકેટ બોર્ડનો ચોંકાવનારો નિર્ણય, ટેસ્ટ કેપ્ટન શાન મસૂદને વહીવટી જવાબદારી સોંપી

PCB Appoints Shan Masood: પાકિસ્તાન અને દક્ષિણ આફ્રિકા વચ્ચેની રોમાંચક ટેસ્ટ સીરિઝ 1-1થી ડ્રો થયા બાદ પાકિસ્તાન ક્રિકેટ બોર્ડે (PCB) એક નિર્ણય લીધો છે, જેનાથી ક્રિકેટ જગતમાં મોટી ચર્ચા જાગી છે. PCBએ તાજેતરમાં જ ટેસ્ટ સીરિઝમાં ટીમનું નેતૃત્વ કરનાર કેપ્ટન શાન મસૂદને આંતરરાષ્ટ્રીય ક્રિકેટ અને ખેલાડીઓના મામલાઓ માટે પોતાના સલાહકાર તરીકે નિયુક્ત કર્યા છે. ક્રિકેટ ઇતિહાસમાં કદાચ આ પહેલીવાર બન્યું છે કે કોઈ રાષ્ટ્રીય ટીમના સક્રિય કેપ્ટનને બોર્ડમાં આટલી મોટી વહીવટી જવાબદારી સોંપવામાં આવી હોય.

કેપ્ટન મસૂદનું સીરીઝમાં શાનદાર પ્રદર્શન

પાકિસ્તાની ટીમે લાહોરમાં રમાયેલી પ્રથમ ટેસ્ટ 93 રનથી જીતી હતી, જ્યારે રાવલપિંડી ટેસ્ટમાં દક્ષિણ આફ્રિકાએ 8 વિકેટથી વિજય મેળવીને શ્રેણી 1-1થી બરાબર કરી હતી. કેપ્ટન તરીકે શાન મસૂદે બેટિંગમાં શાનદાર પ્રદર્શન કર્યું હતું અને શ્રેણીમાં 170 રન સાથે પાકિસ્તાન માટે ટોચના સ્કોરર રહ્યા હતા.

વડાપ્રધાન શાહબાઝ શરીફ દ્વારા દક્ષિણ આફ્રિકાની ટીમના સન્માનમાં આયોજિત રાત્રિભોજન દરમિયાન પાકિસ્તાની ખેલાડીઓને મસૂદની નવી ભૂમિકા વિશે જાણ કરવામાં આવી હતી.

કેપ્ટનશિપ અને નવી ભૂમિકાને લઈને સસ્પેન્સ

PCBના નિવેદનમાં શાન મસૂદની જવાબદારીઓ અથવા આ વ્યવસ્થા કેટલા સમય સુધી ચાલશે તે અંગે કોઈ સ્પષ્ટ વિગતો આપવામાં આવી નથી. બોર્ડે એ પણ સ્પષ્ટ કર્યું નથી કે શાન મસૂદ ટેસ્ટ કેપ્ટન તરીકે ચાલુ રહેશે કે કેમ, અથવા તે બંને જવાબદારીઓ એકસાથે સંભાળશે. હાલમાં PCB ‘ડાયરેક્ટર ઓફ ઇન્ટરનેશનલ ક્રિકેટ (DIC)’ના કાયમી પદ માટે અરજીઓ મંગાવી રહ્યું છે. માનવામાં આવી રહ્યું છે કે કાયમી નિમણૂક ન થાય ત્યાં સુધી મસૂદ કામચલાઉ સલાહકાર તરીકે સેવા આપશે.

આ પણ વાંચો: IND vs AUS : વોશિંગ્ટન સુંદરે ઓસ્ટ્રેલિયાને ત્રીજો ઝટકો આપ્યો, સ્કોર 124/3

સક્રિય કેપ્ટનને વહીવટી પદ? સવાલો ઊભા થયા

શાન મસૂદની નવી નિમણૂકથી ક્રિકેટ નિષ્ણાતોમાં સવાલો ઊભા થયા છે. સક્રિય ટેસ્ટ કેપ્ટન ખેલાડીઓ અને ક્રિકેટ કામગીરી સંબંધિત બાબતોનું સંચાલન કરતી બોર્ડમાં વહીવટી પદ કેવી રીતે સંભાળી શકે? તે એક મોટો સવાલ છે.

કેપ્ટન તરીકે શાન મસૂદનો રેકોર્ડ પણ સરેરાશ રહ્યો છે. તેમણે અત્યાર સુધીમાં 14 ટેસ્ટ મેચમાં પાકિસ્તાનની કેપ્ટનશીપ કરી છે, જેમાંથી માત્ર ચારમાં જ ટીમને જીત મળી છે. હવે જોવાનું એ રહે છે કે ક્રિકેટના મેદાનની બહારની આ નવી અને મોટી જવાબદારી શાન મસૂદના પ્રદર્શન અને પાકિસ્તાની ટીમના ભવિષ્ય પર કેવો પ્રભાવ પાડે છે.