એશિયા કપ 2025 માટેનો શેડ્યૂલ જાહેર થઈ ગયો છે. આ ટૂર્નામેન્ટ 9 સપ્ટેમ્બરથી 28 સપ્ટેમ્બર સુધી સંયુક્ત અરબ અમીરાત (UAE)માં યોજાશે. એશિયન ક્રિકેટ કાઉન્સિલ (ACC)એ 2 ઓગસ્ટે પુષ્ટિ કરી કે ટૂર્નામેન્ટના યજમાન શહેરો દુબઈ અને અબૂ ધાબી રહેશે, જ્યારે ફાઈનલ દુબઈમાં રમાશે. સૌથી વધુ ચર્ચિત ભારત-પાકિસ્તાનની મેચ 14 સપ્ટેમ્બરે દુબઈમાં રવિવારે યોજાશે.

આ ટૂર્નામેન્ટ T20 ફોર્મેટમાં રમાશે, જે ICC T20 વર્લ્ડ કપ 2026ની તૈયારીઓનો ભાગ છે. વર્લ્ડ કપ ભારત અને શ્રીલંકા દ્વારા આયોજિત કરાશે. ગ્રુપ-એમાં ભારત, પાકિસ્તાન, UAE અને ઓમાનની ટીમ છે, જ્યારે ગ્રુપ-બીમાં શ્રીલંકા, બાંગ્લાદેશ, અફઘાનિસ્તાન અને હોંગકોંગ સામેલ છે. ટૂર્નામેન્ટમાં કુલ 8 ટીમો ભાગ લેશે.

એશિયા કપની પ્રથમ મેચ 9 સપ્ટેમ્બરે અફઘાનિસ્તાન અને હોંગકોંગ વચ્ચે રમાશે. ભારત પોતાની પ્રથમ મેચ 10 સપ્ટેમ્બરે UAE સામે રમશે, બીજી મેચ 14 સપ્ટેમ્બરે પાકિસ્તાન સામે અને ત્રીજી મેચ 19 સપ્ટેમ્બરે ઓમાન સામે રમશે.

આ ટૂર્નામેન્ટ પહેલાં ભારત અને બાંગ્લાદેશ વચ્ચે રાજકીય તણાવ વધ્યો છે. BCCIએ ઢાકામાં યોજાયેલી ACCની બેઠકમાં ભાગ લેવાનો ઇન્કાર કર્યો હતો, જેના કારણે ઓગસ્ટ 2025માં યોજાનારી ભારત-બાંગ્લાદેશ દ્વિપક્ષીય સીરિઝ અનિશ્ચિત સમય માટે સ્થગિત કરી દેવાઈ છે.