અમેરિકાના રાષ્ટ્રપતિ ડોનાલ્ડ ટ્રમ્પે ફરી એકવાર પાકિસ્તાન તરફ મહેરબાની દાખવી છે. ટ્રમ્પના શાસન દરમિયાન અમેરિકાના વિદેશ વિભાગે બલૂચિસ્તાન લિબરેશન આર્મી (BLA) અને તેની આત્મઘાતી યુનિટ ‘મજીદ બ્રિગેડ’ને વિદેશી આતંકવાદી સંગઠન (Foreign Terrorist Organization – FTO) તરીકે જાહેર કર્યું છે. આ નિર્ણય પાકિસ્તાની આર્મી ચીફ આસિમ મુનિરની વિનંતીને અનુરૂપ હોવાનું માનવામાં આવે છે, જેમણે આંતરરાષ્ટ્રીય સ્તરે BLA સામે કડક કાર્યવાહીની માગણી કરી હતી.

આ પગલાથી BLAના નાણાંકીય સ્ત્રોતો, હથિયાર સપ્લાય અને વૈશ્વિક સક્રિયતા પર તાત્કાલિક અસર થવાની શક્યતા છે. હવે કોઈ પણ સંગઠન કે વ્યક્તિ જો BLA ને ટેકો આપશે તો અમેરિકી કાયદા હેઠળ તેની સામે કાર્યવાહી થઈ શકે છે. નિષ્ણાતોના મતે, આ નિર્ણયથી BLAનું નેટવર્ક નબળું પડી શકે છે અને આતંકી ગતિવિધિઓમાં ઘટાડો આવી શકે છે. જોકે તેનાથી સંગઠન વધુ તીવ્રતા સાથે હિંસા પર ઉતરી શકે તેવી શક્યતા પણ રહેલી છે.

અમેરિકી વિદેશ વિભાગ દ્વારા આપવામાં આવેલા નિવેદનમાં BLAની અનેક હિંસક ઘટનાઓનો ઉલ્લેખ કર્યો છે — જેમાં 2024ના કરાચી એરપોર્ટ અને ગ્વાદર પોર્ટની નજીકના આત્મઘાતી હુમલાઓ તેમજ 2025માં ક્વેટાથી પેશાવર જતી જાફર એક્સપ્રેસ ટ્રેનનું હાઈજેકિંગનો સમાવેશ થાય છે, જેમાં 31થી વધુ લોકો માર્યા ગયા હતા અને 300થી વધુ મુસાફરોને બંધક બનાવવામાં આવ્યા હતા.

આ પગલાથી ચીનને પણ ફાયદો થશે. BLA CPEC (ચીન-પાકિસ્તાન આર્થિક કોરિડોર) અને ગ્વાદર પોર્ટને સીધી ધમકી આપે છે. BLAનાં દાવા મુજબ પાકિસ્તાન અને ચીન બંને બલુચિસ્તાનના કુદરતી સંસાધનોનું શોષણ કરી રહ્યા છે અને સ્થાનિક લોકોને હક્કો આપતા નથી. BLAનું મુખ્ય લક્ષ્ય સ્વતંત્ર બલુચ રાષ્ટ્રની સ્થાપનાનું છે અને તે પાકિસ્તાની સરકારી અને સૈનિક તંત્ર સામે સશસ્ત્ર વિદ્રોહ ચલાવે છે.

2019માં પણ અમેરિકાએ BLAને SDGT (Specially Designated Global Terrorist) જાહેર કર્યું હતું. હવે 2025માં FTO તરીકેનો દાખલો તેને વધુ કાનૂની અને આંતરરાષ્ટ્રીય માન્યતા આપે છે. વોશિંગ્ટનનો આ નિર્ણય પાકિસ્તાન-અમેરિકા વચ્ચે સુરક્ષા સહયોગને મજબૂત બનાવી શકે છે, પરંતુ તે બલુચ સ્વરાજ ચળવળ માટે મોટો ઝટકો સાબિત થઈ શકે છે.