ઈન્ડિયન પ્રીમિયર લીગ (IPL)માં અંડર ધ ટેબલ ડીલને લઈને ટીમ ઈન્ડિયાના પૂર્વ ખેલાડી રવિચંદ્રન અશ્વિને મોટો ખુલાસો કર્યો છે. અશ્વિને દાવો કર્યો છે કે ચેન્નાઈ સુપર કિંગ્સ (CSK)એ દક્ષિણ આફ્રિકાના યુવા બેટ્સમેન ડેવાલ્ડ બ્રેવિસને ટીમમાં સામેલ કરવા માટે વધારાના પૈસા ચૂકવ્યા હતા. ડેવાલ્ડ બ્રેવિસ, જેને ક્રિકેટ જગતમાં ‘બેબી ડી વિલિયર્સ’ તરીકે ઓળખવામાં આવે છે, IPL 2025માં CSK માટે રમ્યો હતો.

અશ્વિનના જણાવ્યા મુજબ, CSKએ બ્રેવિસને ગુરજપનિત સિંહના ઈજા બાદ રિપ્લેસમેન્ટ તરીકે ટીમમાં લીધો હતો. સત્તાવાર રીતે તે 2.2 કરોડ રૂપિયામાં જોડાયો, પરંતુ અશ્વિનનો દાવો છે કે ખેલાડી અને એજન્ટને વધારાના પૈસા આપીને આ ડીલ પક્કી કરવામાં આવી હતી. સોશિયલ મીડિયા પર અશ્વિને જણાવ્યું કે અનેક ટીમો બ્રેવિસને સાઇન કરવા માંગતી હતી, પરંતુ ઊંચી માંગને કારણે તેઓ પાછી હટી ગઈ. અંતે CSKએ એજન્ટ સાથે વાત કરીને ખેલાડીને મનાવ્યો. અશ્વિનનું કહેવું છે કે આવી ડીલ્સ એટલા માટે થાય છે કે ખેલાડી જાણે છે કે જો આગામી સિઝનમાં તેને રિલીઝ કરવામાં આવશે, તો હરાજીમાં મોટી રકમ મળશે.

IPLના રેકોર્ડ મુજબ, CSKએ 18 એપ્રિલ 2025ના રોજ બ્રેવિસને ટીમમાં સ્થાન આપ્યું હતું. ચેન્નાઈની બેટિંગ લાઇન-અપ નબળી હોવાને કારણે બ્રેવિસ અને આયુષ મ્હાત્રેને રિપ્લેસમેન્ટ તરીકે લેવામાં આવ્યા હતા. ડેવાલ્ડ બ્રેવિસે 6 મેચમાં 225 રન બનાવ્યા, જેમાં 2 અડધી સદીનો સમાવેશ થાય છે અને તેનો સ્ટ્રાઈક રેટ 180 રહ્યો. અગાઉ તે મુંબઈ ઈન્ડિયન્સ માટે 2022 અને 2024માં રમ્યો હતો. અશ્વિનનો દાવો છે કે 2026ની મીની હરાજીમાં બ્રેવિસને લગભગ 30 કરોડ રૂપિયામાં બોલી મળી શકે છે.