અમેરિકાના પૂર્વ રાષ્ટ્રીય સુરક્ષા સલાહકાર જોન બોલ્ટને અમેરિકાના પ્રમુખ ડોનાલ્ડ ટ્રમ્પ પર કટાક્ષ કરતાં કહ્યું કે, “વડાપ્રધાન નરેન્દ્ર મોદીએ ટ્રમ્પને બે વાર નોબેલ પુરસ્કાર માટે નોમિનેટ કરવા જોઈએ.” તેમણે આ ટિપ્પણી ત્યારે કરી જ્યારે ટ્રમ્પે ભારત પરથી રશિયા પાસેથી ક્રૂડ તેલ ખરીદવાના મુદ્દે ઊંચા ટેરિફ લાદ્યા. અગાઉ ટ્રમ્પે ભારત પર 25 ટકા ટેરિફ જાહેર કર્યો હતો, પરંતુ ત્યારબાદ તેણે તેમાં વધુ 25 ટકા વધારો કર્યો, જેના કારણે દ્વિપક્ષીય વેપાર સંબંધોમાં તણાવ વધ્યો.

જોન બોલ્ટને એક ઇન્ટરવ્યુમાં જણાવ્યું કે, “જ્યારે તમે ભારતને નિશાન બનાવીને આવી મોટી ભૂલ કરો છો, જેમ વ્હાઇટ હાઉસે છેલ્લા 30 દિવસમાં કરી છે, ત્યારે વિશ્વાસ પુનઃસ્થાપિત કરવામાં સમય લાગે છે.” પાકિસ્તાન અંગે તેમણે કહ્યું કે, પાકિસ્તાનના વડાપ્રધાન શેહબાઝ શરીફ અને આર્મી ચીફ આસિમ મુનીર ટ્રમ્પ સાથે વ્યવહારનો રસ્તો શોધી રહ્યા છે. સાથે જ યાદ અપાવ્યું કે પાકિસ્તાન ટ્રમ્પને નોબેલ પુરસ્કાર માટે ઔપચારિક રીતે નોમિનેટ કરવાની જાહેરાત કરી ચૂક્યું છે.

ચીન પર ઓછા ટેરિફ અંગે બોલ્ટને કહ્યું કે, “યુક્રેનમાં યુદ્ધ વિરામ લાવવાના ટ્રમ્પના પ્રયાસોથી ભારત સરકાર પ્રભાવિત છે, પરંતુ ભારત પર લાગેલા ટેરિફનું પ્રમાણ ચીનની સરખામણીએ વધુ છે.” તેમણે આ મુદ્દો ઉઠાવ્યો કે અમેરિકા અને યુરોપિયન યુનિયન પોતે પણ રશિયા પાસેથી અનેક વસ્તુઓ ખરીદે છે, અને ચીન પણ રશિયાથી ક્રૂડ લે છે, છતાં ભારત પર વધુ ભાર મુકાયો છે.