ભારતીય ટેસ્ટ ટીમના વાઈસ કેપ્ટન ઋષભ પંત હાલ ગંભીર ઈજાને કારણે ક્રિકેટ મેદાનથી દૂર છે. ઈંગ્લેન્ડ પ્રવાસ દરમિયાન ચોથી ટેસ્ટ મેચમાં ક્રિસ વોક્સના બોલ પર રિવર્સ સ્વીપ રમતાં તે ફ્રેક્ચરનો ભોગ બન્યો હતો. ઈજાની પરિસ્થિતિ એટલી ખરાબ હતી કે પંત મેદાન પર ઊભો રહી શકતો નહોતો અને તેને મીની એમ્બ્યુલન્સની મદદથી બહાર લઈ જવામાં આવ્યો હતો. સ્કેન બાદ જાણવા મળ્યું કે તેના પગમાં ફ્રેક્ચર છે.

પંતે પોતાની ઈન્સ્ટાગ્રામ સ્ટોરી પર પ્લાસ્ટર બાંધેલા પગની તસવીર શેર કરીને લખ્યું: ‘મને આથી નફરત છે.’ જાણકારોના જણાવ્યા મુજબ, પંતને સાજા થવામાં ઓછામાં ઓછા 6 મહિનાનો સમય લાગી શકે છે, એટલે તે આગામી એશિયા કપ 2025માં ટીમ ઈન્ડિયામાં રમવાની સંભાવના ઓછી છે. પંત IPL 2025માં સૌથી મોંઘો ખેલાડી હતો, પરંતુ તેણે ખાસ પ્રદર્શન નથી કર્યું.

આ સ્ટોરી પહેલાં પંતે સોશિયલ મીડિયા પર એક વીડિયો પોસ્ટ કર્યો હતો જેમાં તે શેફનું એપ્રન પહેરીને પિત્ઝા બનાવતો જોવા મળ્યો હતો. પંતે લોટ બાંધીને ટોપિંગ કર્યું અને મજાકિયા અંદાજમાં કહ્યું, ‘ઘરે જમવાનું નથી, આથી પિત્ઝા બનાવી રહ્યો છું.’ વીડિયોના કેપ્શનમાં તેણે લખ્યું હતું: ‘ઈમ્પેસ્ટો, સાલ્સા, ફોર્નો અને હું.’ વીડિયોમાં તેણે ચાહકોને કહ્યું કે આજે તે તેમને વેજિટેરિયન પિત્ઝા બનાવતા શિખવાડશે.