વિશ્વનું સૌથી મોટું અર્થતંત્ર માનવામાં આવતું અમેરિકા હાલ રેકોર્ડ સ્તરના દેવામાં સપડાયું છે. અમેરિકાના ટ્રેઝરી ડિપાર્ટમેન્ટના તાજેતરના રિપોર્ટ અનુસાર, દેશનું કુલ રાષ્ટ્રીય દેવું હવે 37 ટ્રિલિયન ડોલર સુધી પહોંચી ગયું છે. ચિંતાજનક બાબત એ છે કે, હવે દર પાંચ મહિને લગભગ 1 ટ્રિલિયન ડોલર જેટલું દેવું વધતું જાય છે.

જાન્યુઆરી 2024માં અમેરિકાનું દેવું 34 ટ્રિલિયન ડોલર હતું, જે જુલાઈ 2024માં વધીને 35 ટ્રિલિયન અને નવેમ્બર 2024 સુધીમાં 36 ટ્રિલિયન ડોલર સુધી પહોંચી ગયું હતું. તાજેતરમાં આ આંકડો 37 ટ્રિલિયનને પાર કરી ગયો છે, જે અગાઉના અંદાજો કરતા ઘણી વખત ઝડપથી વધ્યું છે.

વિશેષ નિષ્ણાતોનું માનવું છે કે આ વધારાના માટે મુખ્યત્વે કોવિડ-19 મહામારી અને સરકારના ઉંચા ખર્ચ જવાબદાર છે. ટ્રમ્પના કાર્યકાળ દરમિયાન ટેક્સ ઘટાડો અને વધારાના ખર્ચની મંજુરીથી આ દેવામાં નોંધપાત્ર વધારો થયો હતો. ત્યારબાદ બાઇડેન સરકારના રાહત પેકેજો અને ફાઇનાન્સિયલ સહાયથી પણ રાષ્ટ્રીય ખર્ચ વધુ વધ્યો.

કોંગ્રેસના બજેટ કાર્યાલયના અનુમાન મુજબ, માત્ર ટ્રમ્પના સમયના નીતિગત ફેરફારોના કારણે જ આગામી દાયકામાં લગભગ 4.1 ટ્રિલિયન ડોલરનું વધારे દેવું આવી શકે છે.

આ કારણે ફેડરલ રિઝર્વ પર વ્યાજદર વધારવાનો દબાણ પણ વધે છે, જેના પરિણામે લોન મોંઘી થાય છે અને ખાનગી ક્ષેત્રમાં રોકાણ ઘટે છે. એ અર્થતંત્ર માટે લાંબા ગાળે હાનિકારક સાબિત થઈ શકે છે.