અમેરિકાના અલાસ્કામાં આવનારી ટ્રમ્પ અને પુતિનની બેઠકને લઈને મોટી માહિતી બહાર આવી છે. રશિયન રાષ્ટ્રપતિ વ્લાદિમીર પુતિનના પ્રવક્તા દિમિત્રી પેસ્કોવે જણાવ્યું છે કે આ બેઠક પછી કોઈ સંયુક્ત નિવેદન જાહેર થવાની સંભાવના નથી. પેસ્કોવે સ્પષ્ટ કર્યું કે આ બેઠક ખૂબ જ ઉતાવળમાં ગોઠવવામાં આવી છે અને કોઈ દસ્તાવેજ પર હસ્તાક્ષર થવાની શક્યતા ઓછી છે.

સ્થાનિક સમય મુજબ 15 ઓગસ્ટે, એટલે કે ભારતીય સમય મુજબ 15-16 ઓગસ્ટની રાત્રે 1 વાગ્યે, આ મહત્વપૂર્ણ બેઠક શરૂ થશે. અગાઉ અહેવાલો હતા કે બેઠક પછી સંયુક્ત નિવેદન આવશે, પરંતુ ક્રેમલિને આ અહેવાલોને ખોટા ઠેરવ્યા છે.

જોકે, પેસ્કોવે કહ્યું કે બંને નેતાઓ સંયુક્ત પ્રેસ કોન્ફરન્સ કરી શકે છે, જેમાં બેઠક દરમિયાન થયેલા કરાર અથવા સમજૂતી અંગે માહિતી આપી શકે છે. તેમણે ઉમેર્યું કે બેઠકના પરિણામ અંગે અગાઉથી કોઈ અનુમાન ન લગાવવું જોઈએ.

રશિયન ટેલિવિઝન પર પેસ્કોવે ટ્રમ્પ વિશે કહ્યું કે તેઓ મુશ્કેલ મુદ્દાઓને લઈને ‘અત્યંત અસામાન્ય દૃષ્ટિકોણ’ ધરાવે છે, જે રશિયા માટે મહત્વપૂર્ણ છે. આ બેઠકમાં રશિયન પ્રતિનિધિમંડળમાં વિદેશ મંત્રી સર્ગેઈ લવરોવ, રક્ષા મંત્રી બેલૌસોવ, નાણા મંત્રી સિલુઆનોવ સહિત અન્ય અધિકારીઓ સામેલ રહેશે.

બીજી તરફ, ટ્રમ્પે આશા વ્યક્ત કરી છે કે પુતિન યુક્રેન યુદ્ધ સમાપ્ત કરવાના ઇરાદા સાથે આ બેઠકમાં આવશે. ટ્રમ્પે કહ્યું કે જો બેઠક સકારાત્મક રહેશે તો તે યુક્રેનના રાષ્ટ્રપતિ ઝેલેન્સ્કી અને યુરોપિયન નેતાઓ સાથે વાત કરશે, પરંતુ જો પરિણામ ખરાબ રહેશે તો તેઓ સીધા ઘરે પાછા જશે.