ઉત્તરાખંડના ચમોલી જિલ્લાના થરાલી વિસ્તારમાં શુક્રવારે (22 ઓગસ્ટ) મધરાતે વાદળ ફાટવાથી ભારે વિનાશ સર્જાયો હતો. ભારે વરસાદ અને કાટમાળના પ્રવાહથી અનેક ઘર, દુકાનો અને રસ્તાઓ ખોરવાઈ ગયા હતા. થરાલી શહેર, આસપાસના ગામો અને બજારોમાં જનજીવન સંપૂર્ણ રીતે ખોરવાઈ ગયું હતું. વહીવટી તંત્ર અને સ્ટેટ ડિઝાસ્ટર રિસ્પોન્સ ફોર્સ (SDRF)ની ટીમોએ તાત્કાલિક રાહત અને બચાવ કામગીરી શરૂ કરી હતી.

આ ઘટનાનો સૌથી વધુ પ્રભાવ થરાલી બજાર, કોટદીપ અને તહસીલ પરિસરમાં જોવા મળ્યો હતો. કાટમાળ તહસીલ કચેરી, એસડીએમ આવાસ અને અન્ય ઘરોમાં ઘૂસી ગયો હતો. પાર્ક કરેલી અનેક ગાડીઓ કાટમાળ નીચે દટાઈ ગઈ હતી. શહેરના રસ્તાઓ પર કાટમાળ એટલો ભરાયો હતો કે રસ્તાઓ તળાવ જેવા દેખાવા લાગ્યા હતા. સાગવાડા ગામમાં એક યુવતી કાટમાળ નીચે દટાઈ જતાં મોત નીપજ્યું હતું, જ્યારે એક વ્યક્તિ હજુ પણ ગુમ હોવાનું જાણવા મળ્યું છે.

ભારે વરસાદના કારણે થરાલી-ગ્વાલદમ અને થરાલી-સાગવાડા માર્ગો પર અવરજવર સંપૂર્ણ બંધ થઈ ગઈ છે. વાહન વ્યવહાર ખોરવાઈ જતાં લોકોને ભારે હાલાકીનો સામનો કરવો પડી રહ્યો છે. BRO (બોર્ડર રોડ્સ ઓર્ગેનાઇઝેશન)ની ટીમ મિંગ્ગદેરા નજીક રસ્તો ખોલવા પ્રયાસ કરી રહી છે જેથી ટ્રાફિક અને રાહત કામગીરી ફરી શરૂ થઈ શકે.

સુરક્ષા હેતુસર જિલ્લા વહીવટીતંત્રે થરાલી તાલુકાની તમામ શાળાઓ અને આંગણવાડી કેન્દ્રોને શનિવાર (23 ઓગસ્ટ) માટે બંધ રાખવાનો આદેશ આપ્યો છે. જિલ્લા મેજિસ્ટ્રેટ ડૉ. સંદીપ તિવારીએ જણાવ્યું હતું કે પોલીસ અને વહીવટીતંત્રની ટીમો સતત સ્થળ પર હાજર રહી રાહત અને બચાવ કાર્યમાં વ્યસ્ત છે.