અમેરિકાના પ્રમુખ ડોનાલ્ડ ટ્રમ્પે તેમના વિશ્વાસુ સહાયક સર્જિયો ગોરને ભારતના નવા અમેરિકન રાજદૂત તરીકે નિયુક્ત કર્યા છે. સાથે જ તેમને દક્ષિણ અને મધ્ય એશિયાઈ બાબતો માટે ખાસ દૂત તરીકેની જવાબદારી પણ સોંપાઈ છે. ટ્રમ્પે આ મહત્વપૂર્ણ જાહેરાત તેમના સોશિયલ મીડિયા પ્લેટફોર્મ ટ્રુથ સોશિયલ પર પોસ્ટ કરીને કરી હતી. હાલમાં સર્જિયો ગોર વ્હાઇટ હાઉસના પ્રેસિડેન્શિયલ પર્સનલ ઓફિસના ડિરેક્ટર તરીકે સેવાઓ આપી રહ્યા છે. અમેરિકન સેનેટની મંજૂરી મળ્યા બાદ તેઓ સત્તાવાર રીતે ભારતના નવા કાયમી અમેરિકન એમ્બેસેડર બનશે.

ગણનિય બાબત એ છે કે એરિક ગારસેટ્ટીને હટાવ્યા બાદ લગભગ સાત મહિનાની રાહ પછી અમેરિકા દ્વારા ભારત માટે કાયમી રાજદૂતની નિમણૂક કરવામાં આવી છે. સર્જિયો ગોર ભારતના 26મા અમેરિકન એમ્બેસેડર બનશે. ટ્રમ્પે તેમના પોસ્ટમાં જણાવ્યું કે, “મને આનંદ છે કે હું સર્જિયો ગોરને ભારતના આગામી એમ્બેસેડર તરીકે તથા દક્ષિણ અને મધ્ય એશિયાઈ બાબતોના ખાસ દૂત તરીકે નિયુક્ત કરી રહ્યો છું.”