ભારત અને ફ્રાન્સ મળીને સ્વદેશી સ્ટીલ્થ ફાઈટર જેટ અને અન્ય આધુનિક એરક્રાફ્ટ માટે શક્તિશાળી જેટ એન્જિન બનાવવાના મહત્વપૂર્ણ પ્રોજેક્ટ પર કામ શરૂ કરવા જઈ રહ્યા છે. આ પ્રોજેક્ટમાં દેશનું સંરક્ષણ સંશોધન અને વિકાસ સંગઠન (DRDO) અને ફ્રાન્સની એરોસ્પેસ કંપની સેફરાન સહભાગી રહેશે. પ્રસ્તાવ ટૂંક સમયમાં કેબિનેટ કમિટી ઓન સિક્યુરિટી (CCS) પાસે મંજૂરી માટે રજૂ કરવામાં આવશે.

પ્રોજેક્ટનો મુખ્ય લક્ષ્ય 120-કિલોન્યુટન ક્ષમતા ધરાવતો એડવાન્સ એન્જિન ડિઝાઈન, ડેવલપ, ટેસ્ટ, સર્ટિફાઇ અને પ્રોડક્શન કરવો છે. આ ટ્વીન એન્જિનનો ઉપયોગ એડવાન્સ મીડિયમ કોમ્બેટ એરક્રાફ્ટ (AMCA) અને ભવિષ્યના અન્ય જેટમાં થશે. પ્રોજેક્ટમાં 100% ટેકનોલોજી ટ્રાન્સફર થશે, જે ભારતને ડિફેન્સ સેક્ટરમાં વધુ આત્મનિર્ભર બનાવશે.

DRDOને સેફરાનનો પ્રસ્તાવ સૌથી યોગ્ય લાગ્યો છે કારણ કે સેફરાન પહેલેથી જ હેલિકોપ્ટર એન્જિન બનાવે છે અને લાંબા સમયથી ભારત સાથે પાર્ટનરશીપ ધરાવે છે. નવું એન્જિન DRDOના ગેસ ટર્બાઇન રિસર્ચ એસ્ટાબ્લિશમેન્ટ (GTRE) સાથે સહકારમાં વિકસાવવામાં આવશે, જેના માટે અંદાજિત ખર્ચ 7 બિલિયન ડોલર (લગભગ રૂ. 58,000 કરોડ) જણાવાયો છે. સંરક્ષણ મંત્રી રાજનાથ સિંહે આ પ્રોજેક્ટની પુષ્ટિ કરતા કહ્યું કે, આ પગલું ભારતને ફિફ્થ જનરેશન ફાઈટર જેટ્સ બનાવવા તરફ આગળ ધપાવશે અને દેશની સ્વદેશી સંરક્ષણ ક્ષમતાને મજબૂત બનાવશે.

મહત્વપૂર્ણ છે કે મે મહિનામાં રાજનાથ સિંહે AMCAના પ્રોટોટાઇપ ડિઝાઇનને મંજૂરી આપી હતી. આ પ્રોજેક્ટ ભારતને હાઇ-ટેક ફાઈટર જેટ્સ, સ્વદેશી વિમાનવાહક જહાજો, સબમરીન અને હાઇપરસોનિક મિસાઇલ સહિતના નવા સંરક્ષણ ઉપકરણોમાં આત્મનિર્ભર બનવા માટે મજબૂત આધાર આપશે.