બિહારના પટણા જિલ્લામાં શનિવારે (23 ઓગસ્ટ) થયેલા ભીષણ માર્ગ અકસ્માતમાં આઠ લોકોના મોત થયા છે, જ્યારે છ લોકો ગંભીર રીતે ઈજાગ્રસ્ત થયા છે. અકસ્માત બાદ તમામ ઈજાગ્રસ્તોને તાત્કાલિક હોસ્પિટલ ખસેડવામાં આવ્યા હતા. પોલીસે ઘટના અંગે ગુનો દાખલ કરી વધુ તપાસ શરૂ કરી છે.

પ્રાથમિક માહિતી મુજબ, મલમા ગામના કેટલાક લોકો રિક્ષામાં ફતુહા ખાતે ગંગા સ્નાન માટે જઈ રહ્યા હતા. આ દરમિયાન રસ્તામાં પૂરપાટ ઝડપે દોડતી એક ટ્રક રિક્ષાને જોરદાર ટક્કર મારી. ટક્કર એટલી ભીષણ હતી કે રિક્ષાનું કચ્ચરઘાણ થઈ ગયું. ઘટનાસ્થળ પર જ આઠ લોકોના મોત થયા હતા અને છ લોકો ગંભીર રીતે ઘાયલ થયા હતા.

અકસ્માત બાદ ટ્રક ડ્રાઈવર વાહન સાથે ફરાર થઈ ગયો. સ્થાનિકોના જણાવ્યા મુજબ, પોલીસે તાત્કાલિક સ્થળ પર પહોંચી બચાવ કામગીરી હાથ ધરી હતી. ઘાયલ લોકોને નજીકની હોસ્પિટલમાં સારવાર માટે ખસેડવામાં આવ્યા હતા, પરંતુ ગંભીર સ્થિતિને કારણે તેમને પટણાની હોસ્પિટલમાં રીફર કરવામાં આવ્યા.

આ મામલે પોલીસે હિટ એન્ડ રન સહિત અકસ્માતનો ગુનો દાખલ કરી ટ્રક ચાલકની શોધ શરૂ કરી છે. હાલ સુધી ડ્રાઈવર વિશે કોઈ માહિતી સામે આવી નથી.