હરિયાણાના ગુરુગ્રામમાં પ્રખ્યાત યુટ્યુબર એલ્વિશ યાદવના ઘરે 17 ઓગસ્ટે થયેલી ફાયરિંગ કેસમાં મોટો ખુલાસો થયો છે. પોલીસે વધુ બે શૂટર, ગૌરવ અને આદિત્યને પકડી પાડ્યા છે. બંને આરોપીઓ હિમાંશુ ભાઉ ગેંગ સાથે સંકળાયેલા છે અને બંને ફરીદાબાદના રહેવાસી છે. પોલીસે જણાવ્યું છે કે આરોપીઓને એલ્વિશ યાદવના ઘરે 24 રાઉન્ડ ફાયરિંગ કરવા બદલ 50-50 હજાર રૂપિયા આપવામાં આવ્યા હતા.

પોલીસ તપાસમાં ખુલ્યું છે કે ગૌરવ અને આદિત્ય નીરજ ફરીદપુરિયાના સંપર્કમાં હતા, જે હાલ અમેરિકામાં રહે છે. હુમલાની ઘટના ઘરની બહાર લગાવેલા CCTV કેમેરામાં કેદ થઈ હતી, જેના આધારે પોલીસે શૂટરોની ઓળખ કરી. આ પહેલા પોલીસે ફરીદપુર ગામમાંથી એક શૂટર ઈશાંત ગાંધી ઉર્ફ ઇશૂની ધરપકડ કરી હતી, જે ફરીદાબાદનો જ રહેવાસી છે. હાલ ત્રણેય આરોપીઓ પોલીસ રિમાન્ડમાં છે અને તપાસમાં વધુ મોટા ખુલાસાની સંભાવના છે.