આગ્રા: ચેન્નાઇથી નેપાળ સુધી ફેલાયેલ નકલી દવાઓના મોટા સિન્ડિકેટનો ખુલાસો થયો છે. સ્પેશિયલ ટાસ્ક ફોર્સ (એસટીએફ) અને દવા વિભાગે મળેલી માહિતી પ્રમાણે હિમાંશુ અગ્રવાલની સંચાલિત કંપની હે મા મેડિકો દ્વારા નકલી દવાઓ તૈયાર કરવામાં આવી ને ૧૨ દેશોમાં સપ્લાય કરવામાં આવતી હતી, જેમાં નેપાળ અને બાંગ્લાદેશનો સમાવેશ થાય છે. આગ્રામા હોલસેલ દવા બજારમાં મલ્ટીનેશનલ કંપનીઓ સહિત છ કંપનીઓના નામે નકલી દવાઓ વેચવાની ફરિયાદ મળી હતી, જેના પગલે બે મહિનાથી એસટીએફ અને દવા વિભાગ બિઝનેસ નેટવર્કના તાર શોધી રહ્યાં હતાં.

શુક્રવારની રાતે લખનઉની કંપનીના નામે ૧૦ લાખના બિલ સાથે પુડુચેરીની કંપનીમાં ૮૭ લાખની નકલી દવાઓ મોકલવામાં આવી હતી. તપાસમાં જાણવા મળ્યું કે ચેન્નાઇથી ટ્રેન મારફતે નકલી દવાઓ આગ્રામાં પહોંચે છે અને ત્યાંથી રીક્ષા દ્વારા બે મોટા મેડિકલ સ્ટોર – બંસલ મેડિકલ અને હે મા મેડિકલ સ્ટોરમાં વિતરણ થાય છે. હિમાંશુ અગ્રવાલએ એસટીએફને કાર્યવાહી રોકવા માટે ૧ કરોડ રૂપિયાની લાંચ આપવાનો પ્રયાસ કર્યો, પરંતુ તેની તરત જ ધરપકડ કરવામાં આવી.

હિમાંશુ અગ્રવાલના ગોડાઉનમાંથી મોટી સંખ્યામાં નકલી દવાઓ જપ્ત કરવામાં આવી છે. આસિસ્ટન્ટ ડ્રગ્સ કમિશનરે જણાવ્યું કે ચેન્નાઇથી નકલી એલેગ્રા-૧૨૦ એમજી દવાઓ આગ્રા કેન્ટ સ્ટેશન પર મોકલવામાં આવી હતી. તપાસમાં હિમાંશુએ જણાવ્યું કે દક્ષિણના દવા માફિયા રાજા સિંહ સાથે મળીને આ ગેરકાયદે ધંધો ચાલી રહ્યો છે. હે મા મેડિકો અને બંસલ મેડિકલમાં કરોડોની દવાઓનું સ્ટોક છે, જે અનેક દિવસો સુધી તપાસ હેઠળ રહેશે.

હિમાંશુ અગ્રવાલની કંપની હે મા મેડિકોનું ટર્નઓવર ૪૫૦ કરોડ રૂપિયા છે. બાંસલ મેડિકલનું ટર્નઓવર ૩૫૦ કરોડ રૂપિયાનું છે, જયારે દુકાનની જગ્યા નાની હોવા છતાં મોટા ગોડાઉન મારફતે દવાઓની સંગ્રહ કરવામાં આવી રહી છે.