ગઢચિરોલી: મહારાષ્ટ્રના ગઢચિરોલી જિલ્લામાં પોલીસ અને માઓવાદીઓ વચ્ચે ગંભીર અથડામણ નોંધાઈ છે. માહિતી અનુસાર, ગઢચિરોલી-નારાયણપુર સીમાના કોપરશી જંગલ વિસ્તારમાં છુપાયેલા માઓવાદીઓ સામે પોલીસે ઓપરેશન ચલાવ્યું હતું. પોલીસે પ્રાપ્ત ગુપ્ત સૂચના અનુસાર એડિશનલ પોલીસ અધિક્ષક એમ. રમેશની આગેવાનીમાં સી60ની 19 ટીમો અને સીઆરપીએફ ક્યૂએટીની બે ટીમો સ્થળ પર પહોંચી હતી.

ભારે વરસાદના માહોલ વચ્ચે સવારે શોધખોળ અભિયાન શરૂ કરવામાં આવ્યું હતું. ત્યારબાદ માઓવાદીઓએ અચાનક પોલીસ દળ પર આડેધડ ગોળીબાર કર્યો. પોલીસ દળે પણ તત્કાલ પ્રતિસાદ આપ્યો. લગભગ આઠ કલાક સુધી ચાલેલી અથડામણમાં ત્રણ મહિલાઓ સહિત ચાર માઓવાદીઓને ઠાર કરવામાં આવ્યા છે.

અથડામણ દરમિયાન પોલીસે ઘટનાસ્થળેથી એક એસએલઆર રાઈફલ, બે ઈન્સાસ રાઈફલ અને 1.303 રાઈફલ સહિત હથિયારો અને દારૂગોળો જપ્ત કર્યા છે. મ્રૃતકોમાં ત્રણ મહિલાઓ અને એક પુરુષ સામેલ છે. ઘટના પોલીસ અને સ્થાનિક સુરક્ષા દળ માટે ગંભીર ચેતવણી રૂપ બની છે અને વિસ્તૃત તપાસ ચાલુ છે.