ઉત્તરાખંડમાં ચોમાસાની ઋતુ સતત કુદરતી આફતો લઈને આવી રહી છે. રાજ્યના વિવિધ વિસ્તારોમાં વારંવાર આભ ફાટવાની ઘટનાઓ સર્જાતા ભારે વિનાશ ફેલાયો છે અને સ્થાનિકોમાં ભયનો માહોલ છે. ગઇકાલે રાતે ચમોલી જિલ્લાના દેવાલ વિસ્તારના મોપાટામાં ફરી એકવાર આભ ફાટ્યો હતો, જેના કારણે મોટી હાનિ થઈ છે.

માહિતી મુજબ આ દુર્ઘટનામાં બે લોકો ગુમ છે, જેમા તારા સિંહ અને તેમની પત્નીનો સમાવેશ થાય છે. ઉપરાંત, બે લોકોને કાટમાળ નીચેથી જીવતા બહાર કાઢવામાં આવ્યા છે, જેમની હાલત ગંભીર છે અને તેઓ હાલ હોસ્પિટલમાં સારવાર હેઠળ છે.

જિલ્લા અધિકારી સંદીપ તિવારીએ જણાવ્યું કે આ કુદરતી આફતથી અનેક મકાન અને ગૌશાળાઓને નુકસાન થયું છે. કાટમાળ અને કાદવ ઘરોમાં ઘુસી જતાં હૃદયદ્રાવક દૃશ્યો સામે આવ્યા છે. આશરે 15-20 પશુઓના મૃતદેહો કાટમાળમાં દટાયેલાં હાલતમાં મળી આવ્યા છે, જેના કારણે વિસ્તારમાં શોકનો માહોલ છે.

આભ ફાટ્યાની જાણ થતાં જ સ્થાનિક તંત્ર અને ડિઝાસ્ટર મેનેજમેન્ટની ટીમે ઘટનાસ્થળે પહોંચી રાહત અને બચાવ કામગીરી શરૂ કરી હતી. ભારે વરસાદને કારણે પ્રદેશમાં ભૌગોલિક અસુરક્ષિતતા વધી રહી છે, જેના કારણે પ્રજામાં ચિંતા વ્યાપી છે.