જમ્મુ-કાશ્મીરના ગુરેઝ સેક્ટરમાં સુરક્ષા દળોએ મહત્વપૂર્ણ સફળતા મેળવી છે, જ્યારે આતંકીઓની દુનિયામાં ‘હ્યુમન GPS’ તરીકે ઓળખાતા બાગુ ખાન ઉર્ફે સમંદર ચાચાને ઠાર મારવામાં આવ્યો છે. સમંદર ચાચા સાથે એક અન્ય પાકિસ્તાની આતંકી પણ એન્કાઉન્ટરમાં ઠાર થયો હતો.

સુરક્ષા સૂત્રોના જણાવ્યા અનુસાર, બાગુ ખાન વર્ષ 1995થી પાકિસ્તાન અધિકૃત કાશ્મીર (POK)માં રહેતો હતો અને છેલ્લા ત્રણ દાયકામાં 100થી વધુ ઘૂસણખોરીના પ્રયાસોમાં સંકળાયેલો હતો.

પહાડી વિસ્તારોના ગુપ્ત માર્ગો વિશેનો તેનો ઊંડો જ્ઞાન આતંકી સંગઠનો માટે ખૂબ જ મહત્વપૂર્ણ હતો. બાગુ ખાન હિઝબુલ આતંકી સંગઠનનો કમાન્ડર હોવા છતાં, તે અન્ય અનેક આતંકી સંગઠનોને ઘૂસણખોરીની યોજનાઓ બનાવવા અને અમલ કરવા માટે મદદ કરતો હતો, જેના કારણે તેને આતંકીઓ ‘હ્યુમન GPS’ તરીકે ઓળખતા હતા.

સૂત્રોના જણાવ્યા અનુસાર, 28મી ઓગસ્ટની રાત્રે, બાગુ ખાન નૌશેરા નાર વિસ્તારમાં ફરીથી ઘૂસણખોરી કરવાનો પ્રયાસ કરતી વખતે સુરક્ષા દળોએ તેને ઘેરી લીધો. તેની સાથેનો અન્ય પાકિસ્તાની આતંકી પણ એન્કાઉન્ટરમાં ઠાર થયો. સુરક્ષા અધિકારીઓ મુજબ, સમંદર ચાચાનું મોત આતંકી સંગઠનોના લોજિસ્ટિક નેટવર્ક માટે મોટો ઝટકો છે અને ઘણા ઘૂસણખોરીના સંભવિત પ્રયાસો નિષ્ફળ ગયા છે.