ભારત સામે ટ્રમ્પ સરકાર દ્વારા લગાવવામાં આવેલા કડક ટેરિફની વચ્ચે રશિયાએ ખુલ્લેઆમ ભારતના સમર્થનમાં અવાજ ઉઠાવ્યો છે. રશિયાના રાજદૂત રોમન બાબુશ્કિને જણાવ્યું કે જો અમેરિકા ભારતના ઉત્પાદનો નહીં ખરીદે, તો રશિયા તૈયાર છે. તેમણે ઉમેર્યું કે ભારતને ઓઈલ પર મળતી ડિસ્કાઉન્ટ સ્કીમ ચાલુ રહેશે અને ભારત માટે રશિયન બજારો ઓપન છે.

બાબુશ્કિને ભારત સાથે વ્યાપક ટ્રેડ કોરિડોરની રજૂઆત પણ કરી છે અને તેને સમયની માંગ ગણાવી છે. તેમણે સ્પષ્ટ કર્યો કે રશિયા ભારત સાથે ઊર્જા અને સુરક્ષા બંને ક્ષેત્રોમાં સહયોગ વધુ મજબૂત બનાવવા તૈયાર છે. બીજી તરફ વ્હાઇટ હાઉસની સચિવ કેરોલિન લેવિટે જણાવ્યું કે રશિયા-યુક્રેન યુદ્ધમાં ભારતની ઓઈલ ખરીદી પુતિનને નાણાંકીય સહારો આપી રહી છે, જેના જવાબમાં ટ્રમ્પે ભારત પર 50% ટેરિફ લગાવ્યા છે – જેમાંથી 25% અમલમાં આવી ચૂક્યા છે અને બાકીના 25% 27 ઓગસ્ટથી લાગુ પડશે.

રશિયાએ એમ પણ જણાવ્યું છે કે તેઓ પાસે એવી વ્યવસ્થા છે કે જેથી અમેરિકન ટેરિફ ભારતના વેપાર પર કોઈ અસર નહીં કરે. તેમણે કહ્યું કે ભારતે અમેરિકન પ્રતિબંધોની ચિંતા કરવાની જરૂર નથી. ભારતના ઉત્પાદકો માટે રશિયન માર્કેટ ઓપન છે અને તેઓએ ભારતના ઉત્પાદનોનું સ્વાગત કરવા તૈયાર છે.

બાબુશ્કિનું વધુમાં કહેવું છે કે ભારત અને રશિયા વચ્ચેના સંબંધો વિશ્વાસભર્યા છે અને સમય સાથે વધુ મજબૂત બન્યા છે. તેમણે સ્પષ્ટ જણાવ્યું કે બંને દેશો પોતાની દ્વિપક્ષીય વેપાર મૂલ્ય 2030 સુધીમાં 100 અબજ ડોલર સુધી લઇ જવા માટે પ્રતિબદ્ધ છે. બ્રિક્સના મહત્વ પર વાત કરતાં બાબુશ્કિણે જણાવ્યું કે આજના અસ્થિર યુગમાં BRICS એક વિશાળ સ્થિરતા અને શક્તિનો કેન્દ્ર બની ગયું છે. BRICS અર્થતંત્ર આજે 77 લાખ કરોડ ડોલર છે, જ્યારે G7 દેશોનો કુલ અર્થતંત્ર 57 લાખ કરોડ ડોલર છે.

આ તમામ દાવાઓના માધ્યમથી રશિયાએ સ્પષ્ટ સંદેશ આપ્યો છે કે ભારત તેના માટે માત્ર એક વેપારસાથી નહીં, પણ ઊર્જા, સુરક્ષા અને ભવિષ્યની વ્યૂહરચના માટે અગત્યનો ભાગીદાર છે. ટ્રમ્પ સરકારના પ્રતિબંધો છતાં, ભારત-રશિયા સંબંધો નવી ઊંચાઈએ પહોંચી શકે છે.